加載中. ..
PDF
i
100 年全國語文競賽臺灣客家語朗讀文章文章（南四縣腔）
目 次
【考試个時節】 ...........................................................................................................1
【外阿公个屋】 ...........................................................................................................2
【落雨个時節】 ...........................................................................................................3
【食夜个時節】 ...........................................................................................................4
【客家美食】 ...............................................................................................................5
【𠊎个阿姆】 ...............................................................................................................6
【牛角會轉彎】 ...........................................................................................................7
【廚房經驗】 ...............................................................................................................8
【靚靚个客家盤花】...................................................................................................9
【阿公屋背】 .............................................................................................................10
【好朋友阿湯牯】..................................................................................................... 11
【𠊎最好看个一本書】.............................................................................................12
【好心有好報】 .........................................................................................................13
【阿婆个無字天書】.................................................................................................14
【𠊎印象最深个一堂課】.........................................................................................15
【失敗个經驗】 .........................................................................................................16
【人公仔】 .................................................................................................................17
【𠊎个休閒生活】.....................................................................................................18
【學勤三年，學懶三日】.........................................................................................19
【養成好个讀書習慣】.............................................................................................20
【環境淨俐个重要】.................................................................................................21
【一張相片】 .............................................................................................................22
【𠊎个阿婆】 .............................................................................................................23
【𠊎看三國】 .............................................................................................................24
【𠊎个隔壁鄰舍】.....................................................................................................25
【阿公同𠊎】 .............................................................................................................26
【都市同鄉下个比較】.............................................................................................27
【故鄉个桐花雨】.....................................................................................................28
ii
【阿雪姑个命】 .........................................................................................................29
【生活從省儉做起】.................................................................................................30
【山歌个改良同傳承】.............................................................................................31
【𠊎係後生人，𠊎拒絕毒品】.................................................................................32
【𠊎最好看个一本書】.............................................................................................33
【賺錢可比針挑竻，使錢可比水推沙】.................................................................34
【跋山】 .....................................................................................................................35
【阿婆个智慧】 .........................................................................................................36
【阿新哥个妹仔】.....................................................................................................37
【痛惜地球，尊重自然】.........................................................................................38
【歇个環境同客家文化】.........................................................................................39
【客家民俗】 .............................................................................................................40
【燈籠花】 .................................................................................................................41
【𠊎對客家歌曲个印象】.........................................................................................42
【𠊎个阿婆】 .............................................................................................................43
【阿婆个菜包】 .........................................................................................................44
【阿姆个禁指】 .........................................................................................................45
【問天－－記八八做大水】.....................................................................................46
【一枝草一點露】.....................................................................................................47
【客語能力認證對𠊎个影響】.................................................................................48
【算命】 .....................................................................................................................49
【𠊎歇个社區】 .........................................................................................................50
【阿伯姆】 .................................................................................................................51
【閹雞情】 .................................................................................................................52
【等花開】 .................................................................................................................53
【承天寺後山】 .........................................................................................................54
【歇久他鄉變故鄉】.................................................................................................55
【兩角銀】 .................................................................................................................56
1
100 年全國語文競賽臺灣客家語朗讀文章（南四縣腔 國小學生組） 編號 1號
【考試个時節】鄒瑞梅原作／張美英譯
打早天吂光个時節，吾姆就喊𠊎同吾哥、吾姊床，因為今晡日學校愛考試。𠊎
遽遽起來，看等就會赴毋掣了。明明昨暗晡有認真讀到三更半夜，這下仰會頭暈腦
疺，連東西南北都分毋清楚？管佢三七二十一，死馬當生馬醫，時到時當，無米正來
煮番薯湯。
𠊎三步腳做兩步行，走到教室，看著同學打早就來到學校，也盡認真在該看書。
無幾久，上課个鐘仔聲響了，害𠊎著驚一下，心寒膽顫，盡緊張。心臟差一息仔就會
跳出來了。先生分好考試卷，先略略看一下，無想著每條都係大問題。奇怪，昨暗晡
个夜車坐到哪位去了？到這下還毋知好駛轉來，時間溜溜轉，鉛筆變鋤頭，先生看𠊎
毋曉寫，目金金仔緊看𠊎，𠊎心肝肚緊想，但係都寫無。
講乜奇怪，平常會寫个題目，這下全部都毋記得了，仰仔寫都寫毋會鬥句，斡頭
看其他个同學，有人盡認真在該寫，有人頭那就會爪爛皮了，乜同𠊎共樣寫毋出來。
想著愛出門進前，吾姆還三叮嚀四囑咐，喊𠊎愛好好考試，毋好輸分隔壁个春美。
下課个鐘聲響了，不管考到仰仔，總算係放牛食草了，歸個人都鬆爽了，所有个
同學，好尞个本性也走出來了，吵吵鬧鬧，大家都毋記得頭先考試緊張个氣氛了。
雖然都考忒了，毋過𠊎知自家考啊毋好，尤其係考數學个時節，想到頭那就會爆
忒。國語還做得，臨臨可能使得及格。其他个科目，現下只有交分天命，道歎乜無麼
个用，這種感覺實在蓋痛苦。
「人，愛人打落；火，愛人點著。」𠊎決定了，一枝竹篙撐到底，從今以後，𠊎
定著愛認真讀書，做時間个主人，好好計劃，毋會再過開夜車讀書了，恁呢正會有好
个成績，乜毋會分先生同阿爸、阿姆受氣。
2
100 年全國語文競賽臺灣客家語朗讀文章（南四縣腔 國小學生組） 編號 2號
【外阿公个屋】羅中慧原作／李宜諭譯
講著搞、講著尞，𠊎最好！這下个交通恁利便，總愛有錢、愛有閒，愛去哪仔尞
都使得。但係對𠊎來講，𠊎測著老湖口山頂个羊屎窩最好尞。
吾外阿婆乜歇在羊屎窩，該窩肚有蓋多伙房屋，上家下屋有盡多細人仔陣，大家
共下搞、共下尞蓋生趣。吾外阿婆屋脣有一頭又高又大个榕樹，屋前係闊闊个禾埕，
屋背有茶園同一大片个柑仔園，該跡仔係𠊎童年生活个好地方。
講著該大禾埕，係𠊎等最輒去搞个所在。每暗晡食飽夜，細人仔就會尖共下，圍
一個圓圈仔，你出剪刀𠊎出布，贏个人做王，帶頭搞庰人尋、煮家啦飯仔1，無就比賽
打極樂仔、揇人跤仔，大家搞到歡喜樂天2，一等鬧熱。
柑仔園乜盡餳人。園肚種有蓋多海梨同桶柑，柑仔樹頂个柑仔打忒結了，因為養
分有限，柑仔毋會粒粒恁大、粒粒恁靚，故所愛同忒結个細柑子先過3，伸个正會大。
𠊎等細人仔乜盡無閒、會𢯭手同摘下來个細柑子擳啊遠遠去，每擺都比賽麼人擳最遠
，最遠个人正使得分吾外阿公背等歸，這係最好个獎賞哦！
吾表阿哥、表阿姐一放學，書包一拂就挷等𠊎，三步做兩步走到茶園去搞庰人尋
仔，吾表阿姐做鬼愛扭𠊎等，大家一儕走一片庰起來分佢尋。吾表阿哥最高大淨會庰
頭毋會庰尾，屎朏翹翹，一下仔就分人尋著；𠊎過細隻，儘採鑽到茶樹下，就庰到塞
塞，硬尋都尋毋著。吂知有一擺，𠊎毋睹好嗄溜落水窟肚，手腳搉到烏青，歸到屋下
吾外阿婆看著盡毋盼得，黏時煠鴨卵同𠊎練烏青个腳髀。這下愐起來，實在還感心。
𠊎從細就分吾外阿婆渡大，故所吾外阿公同外阿婆歇个羊屎窩，對𠊎來講係帶有
乳臊同老人臊个好所在。一到放尞日，𠊎就緊想愛去羊屎窩，該就像毋識去過个所在
，恁餳人！每擺都分𠊎有溫暖、快樂个感覺哦！
1 煮家啦飯仔：音zuˋ gaˊ laˊ fan eˋ；扮家家酒。
2 歡喜樂天：音fonˊ hiˋ lagˋ tienˊ；欣喜異常。
3 先過：xienˊ go把長得太密集的果子摘掉一些，即疏果。
3
100 年全國語文競賽臺灣客家語朗讀文章（南四縣腔 國小學生組） 編號 3號
【落雨个時節】鄒瑞梅原作／張美英譯
論真來講，落雨天就係𠊎个救星。
𠊎蓋中意落雨天，因為落雨个時節，做學生仔个𠊎，就毋使到運動坪升旗，乜毋
使聽校長、主任講到一拖拉牯4，你就毋知了，每擺日頭蓋烈个時節，𠊎這瘦挾挾仔个
圓身，就分日頭晒到險險昏忒，晒到毋知人，實在盡艱苦。
記得，有一日个下晝頭，𠊎聽著打雷公，過一下仔，大嫲雨拚拚落。𠊎企啊在窗
門脣，聽等雨水滴滴咑咑5个聲音，就像一首一首快樂个交響曲；看等雨水像仙女樣仔
在樹葉頂跳舞，跳過來、跳過去，將樹葉洗到青溜溜仔6，地泥乜洗到蓋淨俐。
𠊎看吾姆在該無閒屋下个事頭，無時間好搭𠊎，𠊎就同吾姊偷偷仔擎等遮仔、著
等水靴筒行到外背搞水，涿到歸身潦潦。吾姆反身看著𠊎同吾姊一身溼溚溚仔，受氣
傍天，𠊎等分佢刻到臭頭，免不了也分佢請一盤「竹筍炒肉絲」。該暗晡，𠊎就隨寒著
、發燒、打哈啾，害吾姆愁到歸夜無睡，照顧𠊎到天光，這下想起來，實在盡不孝。
𠊎該班有一個鬼頭鬼腦个搞頭王－－阿明仔，佢一下課就走到無看著影。阿明仔
盡惱落雨天，因為佢蓋好打球仔，一旦落雨个時節，先生驚𠊎等寒著，就會限制同學
全部做毋得出去外背尞。下課時節，做毋得去運動坪打球仔，該就像愛收厥命樣仔，
歸日在教室裡肚企坐毋忒，嘴嘟嘟仔踔上踔下，毋知愛仰結煞正好，落雨天嗄變到厥
个剋星。
其實，換一隻心情來看落雨天个世界，也蓋生趣。欣賞在落雨天行來行去个人，
有擎遮仔个人就斯斯文文，慢慢仔在落雨天散步；無擎遮仔个人，就三步做兩步走；
也有人分大車仔噴到一身溚溼，大聲胲緊罵，害𠊎㖸到肚屎痛。
落雨天个情景，千奇百怪，希望大家共下來欣賞街路項一蕊一蕊靚靚个遮仔花，
共下來欣賞落雨天个奇妙世界。
4 拖拉牯：音toˇ la guˋ；卡車；源自日語之外來語（トラック）。
5 滴滴咑咑：音did di d da da；狀聲詞；形容下雨的聲音。
6 青溜溜仔：qiangˊ liuˋ liuˋ eˋ；綠油油的。
4
100 年全國語文競賽臺灣客家語朗讀文章（南四縣腔 國小學生組） 編號 4號
【食夜个時節】曾秋梅原作／李宜諭譯
臨暗頭，讀書放學歸到屋下，封肉香、蒜頭香，一陣一陣，鼻著這兜香味，就知
吾姆無閒洎杈，在該準備歸家人个暗餐了！香味害𠊎个肚屎：咕嚕、咕嚕響，肚飢了
！𠊎三步做兩步行，遽遽走去灶下，𢯭手捽桌仔、撿碗筷，順續仔兜菜。
最餳𠊎食个菜係番薯葉，吾姆炒个番薯葉又青又嫩；還有客家封肉乜蓋好食，每
擺淨攪豬肉味，就食欸兩三碗飯了，吾姆看著恁呢，就會講：「少食多香味，多食傷腸
胃！」吾爸、吾姆兩儕都係農家子弟，特別堅持米飯个味緒，因為「粒粒皆辛苦！」
食夜時節，係𠊎最快樂个時節，因為歸家人使得共下享受吾姆用愛來煮个暗餐。
還使得緊食飯緊講今晡日在外背堵著个生趣事。有一擺，吾哥講笑分𠊎等聽，害吾姊
同嘴肚个飯噴啊吾哥滿面都係，歸家人乜跈等㖸到揞肚屎。食夜个時節，你一嘴、𠊎
一嘴，盡鬧熱，淨吾姆過毋好講話，問佢仰毋講今晡日在屋下發生个生趣事，吾姆講
：「日時頭去田坵肚割草，草毋會講話；去遶檳榔園，檳榔樹直直企等，恬恬仔緊看𠊎
，共樣毋同𠊎講話。故所，食夜个時節，使得聽著歸家人快樂个話絮，就盡滿足了！
」著哦！吾姆無上班，又毋好過家尞，歸日仔無講話个對象。乜因為恁呢，每暗晡食
夜个時節，佢就係最登真个聽眾了！
雖然吾屋下食夜時節使得輕鬆講話，但係吾爸規定做毋得一片看電視、一片食飯
。佢个道理係：「日時頭若爸上班，你等細人仔去學校上課，食飽夜又愛寫學校功課，
歸家人共下打嘴鼓个時間既經蓋少了！歸家人共下坐等食飯，正有機會交談、互相關
心！」另外，食飯時節乜做毋得腳跍起來，有時，吾哥講到激動个時節，會毋記得，
腳又跍等食飯，吾爸就會緩緩仔講：「𠊎等無蒔田割禾，毋使請割禾班仔！」聽著吾爸
恁呢講，吾哥有兜仔壞勢，歸家人又大聲㖸起來！
食夜个時節，係𠊎感覺最生趣、最快樂、最幸福个時節！
5
100 年全國語文競賽臺灣客家語朗讀文章（南四縣腔 國小學生組） 編號 5號
【客家美食】徐貴榮原作／李宜諭譯
頭擺，客家人一直歇啊在山項、田莊，耕田打林，愛用蓋多个體力，故所，食雜7
同一般人無共樣，變成𠊎等客家「食」个文化。講著這客家美食，𠊎个口涎水險險就
會溚溚跌8了！
在𠊎个印象中，酸酸个豬腸炒薑絲，薑絲嫩嫩、豬腸脆脆，食起來有一息仔酸丟
丟仔，客家人就係好食這味緒。叔公、阿伯登常講：「食加兩碗飯，做起事來過有力頭
，豬腸無了味9也好，同飯攪攪啊，蓋扯飯哦！」
頭擺吾公不時講：分人請，無食著炒肉就像無食著豐沛樣仔。原來這炒肉就係今
晡日大家講个「客家小炒」，裡背用蔥白、魷仔、三層腈，加兜仔香料，大火炒到噴香
。魷仔蓋香，三層腈毋會肥，食過个人都會講：恁平常个東西，仰會炒到恁香、恁有
味緒呢？這就係客家人料理食品个本事，也係客家美食个代表菜。
其他像筍乾同封肉、清甜个雞肉斬盤、酪酪个豬腳、一垤一垤搵蒜仁醋个鹹豬肉
，還有清清个覆菜排骨湯，食起來就係恁有客家人个味緒。
另外，客家人登常用自家種个米穀來做各種點心。最有名个就係莊頭莊尾一到做
鬧熱、做好事个時節，家家屋屋就會打粢粑、搵糖粉來請人客！講著這粢粑，𠊎就會
想著還細个時節，不時跈等吾婆去分人請，食飯前，總有一大群人手拿筷仔，一片剪
粢粑搵香香个番豆粉，一片同親戚朋友打嘴鼓，又食又講，看啊過去，每儕都笑弛弛
仔，該種親切个感覺，只有客家人正會了解。
客家人个點心，還有包蘿蔔絲个菜包，軟軟韌韌个水粄、比大麵還過好食个粄條
、又韌又滑个米篩目。現下，客家美食既經變成大眾化个食品了。
這下，不管係在屋下也係在外背，𠊎不時會想著還細个時節，吾婆做分𠊎食个點
心。下二擺，𠊎定著愛學做客家美食，做出阿婆个味緒，分大家來認識客家食个文化
。
7 食雜：音siid cab；吃的方面。
8 溚溚跌：音dab dab die d ˋ；形容像雨一樣一直滴下來。
9 味：音mi；湯汁。
6
100 年全國語文競賽臺灣客家語朗讀文章（南四縣腔 國小學生組） 編號 6號
【𠊎个阿姆】古美珠原作／張美英譯
𠊎个阿姆，厥面圓圓，頭那毛盡長，有一對又圓又金个目珠，看著人就笑咪咪仔
，生到盡靚、盡竳線，係一個有愛心又有耐心个人。平常時，除忒照顧𠊎等三姊妹，
對吾公、吾婆乜蓋有孝，親戚朋友，隔壁鄰舍，通體阿佢係一個盡賢慧个婦人家。
雖然屋下毋係盡好額，毋過佢有客家人刻苦耐勞个美德，勤儉傳家个精神，總係將屋
下拚掃到淨淨俐俐，好勢好勢，佢講：「毋驚屋下窮，只愛大細有笑容，𠊎就盡滿足了
。」
吾姆會煮蓋多好食个客家料理，像蘿蔔乾煎卵、芹菜炒魷魚、木米炒黃梨、鹹菜
湯這兜，還有𠊎最愛食个爌肉。佢盡遽手，每擺大姑同二姑來屋下个時節，佢會煮歸
桌大家好食个客家菜，分大家食。
記得吾姆識講過，愛出頭天定著愛認真讀書，雖然𠊎等三姊妹係細妹仔，毋過，
佢對𠊎等个教育盡用心，毋會儘儘採採，放學歸去，佢定著愛𠊎等將功課寫忒正使得
出去尞。記得有一擺，𠊎為著愛出去尞，字就儘採畫畫啊，一下仔就瀉出去，吾姆看
著就砰砰滾講：「亂緊緊欸，搞得著食咩？寫个麼个字？重新寫過！」佢愛𠊎做事情，
慢慢仔來，毋好鬥緊。心愛靜、手愛穩，寫字做事千萬不可馬虎。到今，𠊎寫字定著
規規矩矩，定定仔來，寫到靚靚，別人看欸欣賞，𠊎自家看欸歡喜。
吾姆除忒會要求學校个功課愛做好以外，佢對𠊎等个家教乜盡看重，像掃地泥，
捽桌凳，洗碗這兜，連食飯擎筷仔，通體就愛做到確確實實，吾姆對𠊎等講：「屋愛日
日掃，田愛日日到，書愛時時讀！」又講：「一日學習一日功，一日毋學十日空！」就
係愛𠊎認真讀書。𠊎發病个時節，佢會日合夜照顧𠊎，天時轉涼，會喊𠊎著加一領衫
。
這下，𠊎愛感謝𠊎个阿姆，伸出佢燒暖个雙手，牽等𠊎向前行。𠊎愛吾姆，𠊎定
著愛聽吾姆个話，認真讀書，做一個規規矩矩，正正當當个人，來報答佢个恩情。
7
100 年全國語文競賽臺灣客家語朗讀文章（南四縣腔 國小學生組） 編號 7號
【牛角會轉彎】謝惠如原作／李宜諭譯
「牛角會轉彎」係莊肚流傳盡久个故事。
聽講清朝時代，先民在六堆地區个內埔、竹田、萬巒這兜所在開墾土地，開墾初
期，雜草、大樹生啊一哪仔都係，石頭礫礫矻矻、大細粒都有；該下為著愛開拓土地
，每家每戶大部分都有畜牛仔，故所「牛仔」就變成最有力个開墾助手。日時頭利用
牛仔來犁田、耕作、做田坵肚个事頭，放工後，就同牛仔牽啊圳溝肚揾浴，無就到河
壩食水、洗身。
牛仔个砸磳同耐操、耐勞係一種最基本乜係最重要个條件，愛恁呢正有辦法分主
人在該做田坵肚个事頭个時節，使得過順序、有效力。愛擇一頭過砸磳、過好个牛仔
，大部分係靠「牛刮仔10」。佢等為著生理，不時都愛一哪仔去打探，希望尋著使得買
賣、條件過好个水牛。若係有看著合意个牛仔，主人又毋肯賣，會挶心事11个牛刮仔就
會聯合該兜專門偷牛仔个賊仔，利用暗晡頭下夜時節，用「偷」个方式來偷牽牛仔。
第二朝晨主人䟘床後，發現著水牛毋見忒了，就會趟快去衙門報案。清朝時期，
衙門裡肚个師爺就會拿出紙筆，根據主人个話，將牛仔个形體、樣貌、牛角生長个彎
度，詳詳細細个畫出來，等尋著个時節，正使得忒對。除忒報案以外，牛仔个主人自
家乜會一哪仔尋上尋下。
蓋奇怪个事情就係，佢等在牛販仔个牛欄肚認出自家个牛仔个時節，該頭牛仔乜
會出聲點頭應厥主人，但係分佢等愐毋解个係，這頭牛仔明明係自家畜欸三年零个，
佢个眼神、佢个牛絭鼻、還有佢个牛蹄這兜，從頭到尾看起來都盡熟，仰仔牛角个彎
度無共樣了？
後來正聽講該偷牛仔个賊仔有一種奇術12，使得分這硬仃仃个牛角，一日之間轉彎
，變到無共樣个角度，假使牛仔个主人尋著厥牛仔，乜毋敢相認，因為連官府乜奈佢
等毋何。這下，這種牛角會轉彎个技術，既經失傳了。
10 牛刮仔：音ngiuˇ guadˋ eˋ；牛販。
11 挶心事：音giug xi mˊ sii；攻心計。
12 奇術：音kiˇ sud；魔術。
8
100 年全國語文競賽臺灣客家語朗讀文章（南四縣腔 國小學生組） 編號 8號
【廚房經驗】古美珠原作／張美英譯
古琢古琢真古琢，做好事，擎凳桌，張伯姆就好手腳，火一著就喊坐桌，雞肉盤
拿來剁，煲豬腳愛咬得落，鹹菜湯一大鑊，芹菜魷魚加減落，客家小炒加幾杓，仰會
恁豐沛，遽遽來坐桌啊來坐桌！
吾姆煮个菜又香，又肥，又好食，佢每擺煮菜，𠊎就企啊到脣口看，看佢一下仔
就煮好一桌菜，𠊎覺著煮菜係盡簡單个事情，每擺想愛煮，吾姆都毋肯，講𠊎還細。
有一擺機會來了，吾姆愛出去辦事情，到暗正歸，佢吩咐𠊎講：「阿珍妹！你毋係蓋想
煮菜咩？當晝个菜就分你煮好了。」𠊎想，表現个機會來了，煮菜就像食粥共樣恁簡
單！
該當晝，𠊎煮三項菜，第一項菜係煎豆腐，𠊎先將豆腐切一垤一垤，放落去煎，
愛貶面个時節，奇怪？仰會恁難貶，一鑊豆腐分𠊎貶到綿綿！𠊎好食辣个，就想滴兜
辣油，結果啊，手忒遽，一倒就歸半罐，𠊎試食一口，阿姆哀！會辣死人哦！第二項
菜係炒青菜，這定著毋會有問題了，𠊎將火開蓋猛，菜擲落去正炒著兩下仔，電話響
了，𠊎遽遽去接電話，結果電話吂講煞，菜就臭火燒了！最尾一項菜係煎魚仔，𠊎同
自家講，這係最尾一項菜，定著做毋得漏氣，結果，「相佛容易，刻佛難﹔看花容易，
繡花難。」一尾魚仔又分𠊎煎到肉做肉、骨做骨，會閼死人，又失敗了！做麼个𠊎看
吾姆煮菜恁簡單，仰仔𠊎煮起來會恁難呢？
吾爸看著桌頂个菜，緊看緊㖸，吾老妹食到牙研目皺13，雖然蓋壞食，佢等還係將
菜食淨淨。吾爸講𠊎蓋乖，只愛𠊎肯學，肯做，總有一日會成功个。
背尾，𠊎問吾姆正知，原來魚仔同豆腐，全部愛等鑊頭烈烈正使得放落去，還有
做毋得忒早貶面，正毋會貶到綿綿。原來係恁呢，煮菜个學問也蓋大，毋係看阿姆个
動作、翻兩本食譜，就做得洗手做羹湯。
13 牙研目皺：ngaˇ ngienˇ mugˋ jiu；咬著牙根，眉頭緊鎖，忍受痛苦的樣子。
9
100 年全國語文競賽臺灣客家語朗讀文章（南四縣腔 國中學生組） 編號 1號
【靚靚个客家盤花】鍾清蘭原作／李宜諭譯
在廟肚唱喏个老先生同𠊎等講，頭擺大家經濟無這下恁好，街項乜無人賣花，當
時乜無時行用花盎仔來插花；到欸神明生个時節，就愛用香花、清茶、水果、紅布、
金花、牲體來祭拜。在舊曆个每隻月初一同十五个時節，乜係愛用清茶、盤花、水果
來祭拜，故所這隻盤花，使得講係客家个特色，在祭拜儀式中，係非常重要个部份。
頭擺拜个盤花所使用个花材，在廟堂同伯公壇無共樣，廟堂肚拜个花，定著愛有
香味，越香越好。盤花基本个花材有蓋多，像仙丹花、芙蓉、扁柏、大理花、圓粄花
、山馬茶、白花仔、夜合、含笑、樹蘭、菊花、玫瑰花、蓮蕉花……這兜，但係手指
甲花就擺毋得。愛用一般人家屋前、屋背所種个花、樹為主，花蕊愛用剪个，恁樣正
毋會傷著花樹个樹身，乜代表客家人勤儉，肯食苦个精神。
祭拜過个盤花，在神桌項收下來過後，先晒燥來，莫丟忒、莫浪忒，因為還有一
隻蓋大个用處。識聽過老人家講，這種經過神明加持个花草，分大家拿來洗身，使得
避邪、保平安。係講細人仔著驚、嚇著，暗晡頭睡目毋得，將花草浸水來洗圓身，就
有收驚个效果！聽講壞運个時節，係堵著毋淨俐个東西，花草洗過頭面以後，身體就
會變鬆爽。
擺盤花个時節，蓋慣會照花个大細來擺，越底層愛越大蕊，對盤仔外背向裡背肚
擺好，越疊越高，越拶實越靚，最頂項愛擺一蕊大蕊个紅花，新丁花也係大理花都使
得，乜有人用單一種花材來疊盤花，恁呢就使得變成一盤一盤又圓又靚个盤花了。
用香花、茶、果敬奉，最重要个係誠心、誠意，佢無論多少、無論大細，代表个
係一份真心，希望神明、伯公來保佑大家事事圓滿，大吉大利。
10
100 年全國語文競賽臺灣客家語朗讀文章（南四縣腔 國中學生組） 編號 2號
【阿公屋背】黃火盛原作／張美英譯
在放尞日个時節，𠊎會盡想去吾公个屋下尞，該位有盡靚个山仔，吾公个屋仔係
老時个伙房屋，正身係廳下，服侍阿公婆牌同神明，看起來有兜仔莊嚴，係搞毋得个
所在。
還記得幾下14年前，𠊎同吾細老妹走上神桌頂，去看神主牌，睹好分吾姆看著，吾
姆講：「麼个就搞欸著，連阿公婆都想愛搞了，實在係天背來个。」自該擺過後，𠊎就
無麼个敢去廳下尞。正身兩片側膁係橫屋，吾舅歇啊在該，故所後來𠊎去吾公屋下，
就走去橫屋尋吾表老弟同表老妹尞。
吾公个屋背係無幾高个山仔，種蓋多水果樹，過年時節，逐擺都有柑仔好食。年
過忒，看得著金黃色个枇杷，食起來酸酸無講盡甜。春頭過忒，漸漸仔，桃仔同李仔
，像燈籠樣仔吊到滿樹椏。五月節一過，𠊎盡好食个荔枝就熟了，食起來甜到心肝肚
！荔枝食忒，七月半牛眼無白核，八月半个柚仔同月華餅共下食。
吾公屋下頭前个屋簷下，放蓋多隻滷鹹菜个醃缸，逐擺𠊎歸去就會同吾表老弟、
表老妹在該位搞庰人尋。屋面前个天墀坪15脣，有兩頭大榕樹，長年透天葉仔生到榮榮
，吾公在樹下裝兩副晃槓仔，𠊎同吾老妹輒常在樹下晃來晃去，過欸快樂个童年生活
。
天墀坪出去係禾埕，禾埕側角有一條崎仔，吾公在半崎仔種一頭楓樹，熱天一過
、初秋个時節，楓樹葉仔就漸漸仔紅起來了，這時節，拈楓葉使得編織出𠊎个童年夢
！
崎仔下有一口陂塘，緊工時節，看著大人扛一臺泵浦抽水蔭田，閒時看著陂塘項
，有幾下個鵝仔同一群鴨仔，在該陂塘个水面泅來泅去，安然自在，日仔過到分人蓋
欽羨16。吾公在陂塘肚畜蓋多魚仔，每擺臨晝邊仔，吾舅會帶𠊎去釣魚仔，佢還教𠊎「
姜太公釣魚，離水三寸，願者上鉤！」故所，釣梹自家做，用糠仔來餳魚仔，逐擺看
著浮胖仔停動，吾心肝肚就盡暢，想講會有大尾魚來食釣了，毋過偏偏大尾無食釣，
細尾湢湢跳，盡後背大體會空手轉去，恁呢乜盡好搞，真想逐日就歇在吾公个屋下。
14 幾下：音giaˊ；指次數有許多次。「幾下」為（giˋ ha）一詞合音而產生。
15 天墀坪：音tienˊ ciiˇ piangˇ；庭院。
16 欽羨：音kimˊ xien；羨慕。
11
100 年全國語文競賽臺灣客家語朗讀文章（南四縣腔 國中學生組） 編號 3號
【好朋友阿湯牯】黃鈺雯原作／李宜諭譯
兩年前正考著國中美術班，一儕人對鄉下到都市項讀書，恁多同學，無一個係熟
事个，心肝肚盡愁慮。吾姆就同𠊎講，𠊎等愛主動同人相借問，講話愛細聲細義、有
禮貌、莫計過，自然就會交著好朋友。
這兩年半來，𠊎交著蓋多好朋友，大家攞到盡好、盡相惜，其中最知己个還係阿
湯牯。淨看厥外表，頭大大，人矮頓矮頓，面相戇戇个樣仔，會覺著佢像一個細憨牯
。佢盡好打網路電動，不時一搞就搞到毋知晝暗。實際上，佢係一個精砉砉仔个細倈
仔，詩書滿肚，登常拿著全校第一名。𠊎識問佢，恁會搞，仰還有時間讀書呢？佢講
：「心專石穿！𠊎搞个時節盡量搞，愛流汗，愛分腦筋轉擺一下。但係拿起書本，絕對
愛專心，周圍發生麼个事，都毋使管。畫圖就專心畫、看歷史毋會想讀英文、遶山花
毋會想著考試！確實盡有效，𠊎做每一件事情都變到相當有效率。」
𠊎蓋佩服佢「手痛好過家，腳痛好繡花」个生活態度，盡樂線！這乜看出佢盡把
握時間同機會，總會想：現下个處境，使得做麼个事情。比將講，放學時間過慢，赴
毋著車枋，別人都係怨這怨該宕時間，佢就恬恬仔拿出書來背，毋會怪天怨地！𠊎會
恁樂觀，就係受著佢影響。
雖然佢字墨蓋飽，上知天文，下知地理，但係佢毋會奢鼻，總係用「交人交心，
淋樹淋根」个誠意對待𠊎，每擺請教佢數學同自然，佢都會教𠊎解題个要領，分𠊎事
半功倍，確實係「知得孔竅，打得鬼噭！」最難得个就係毋會驚𠊎贏過佢，下把仔，
𠊎考試拚贏佢个時節，佢就會一頭用「十步留一步，免得徒弟打師傅！」來同𠊎講㖸
，一頭又同佢會个方法總概傳分𠊎，確實做著「真師傅，教徒弟毋留半步。」𠊎兩儕
就恁樣相互敬重，相互勉勵，故所成績就真好。
佢乜盡會挑試打落𠊎、刺激𠊎，每擺都講𠊎「慢牛食汶水」，又講𠊎讀書个方法總
係「蚊仔叼牛角」，唉！測著盡得人惱！但係，「人愛人打落、火愛人燒著。」還係盡
感謝佢提醒𠊎、督促𠊎，做吾人生个鏡仔。
俗話講：「良言莫嫌少，朋友莫嫌多！」𠊎兩儕知己知彼，更加个了解自家个缺點
同優點，知著自家个弱點，正會發覺將來愛打拚个方向在哪。加兩隻月，就愛畢業了
，心肝肚盡毋盼得！𠊎等講好會顧好各人个前途，繼續打拚，定著愛完成自家个理想
！
12
100 年全國語文競賽臺灣客家語朗讀文章（南四縣腔 國中學生組） 編號 4號
【𠊎最好看个一本書】林秋香原作／李宜諭譯
頭擺人講：「三日無讀書，腦筋就會生鹵。」吾姆乜不時同𠊎等講：「毋讀詩書，
有眼無珠，毛籣恁大個个字都毋識，書肚講个人生大道理，你等定著愛記得，日常生
活裡肚，對人、對事，哪當時都用欸著。」
𠊎最好看个一本書，就係在舊年生日个時節，吾姆送𠊎个「佐賀个超級阿婆」這
本書。故事个主角昭廣，從細係一個無阿爸个細人仔，因為厥姆無法度照顧佢，八歲
該年送佢歸到鄉下个阿婆屋家歇，迎接佢个係一間犖犖确确17个茅屋，還識帶過七個大
細，辛苦堅耐過清苦生活个超級阿婆，雖然日仔苦到攞鹽攪飯、傍豆豉來過日仔，樂
天知命个阿婆總有神奇又百變个生活方式。
阿婆屋下歇啊在河壩脣，河壩个頂項係市場，阿婆搭架仔攔河壩頂項流下來个食
物，還㖸講這條河壩係厥屋下个菜市場，但係菜單愛由河神決定，無法度自家擇愛食
麼个菜。日求三餐，夜求一宿，就親像蟻公銜泥係過日仔，牛牯梆車乜係過日仔。在
恁呢个生活裡肚，嗄加續豐富欸昭廣个心靈，再苦乜共樣知足快樂來過日仔。講著佐
賀个超級阿婆，佢這種樂天知命个想法，𠊎就愐著自家每擺吵等愛食麥當勞，無食著
還會蓋譴，實在係人在福中毋知福啊！
這本書分𠊎最感動个就係，阿婆不管日仔有幾苦，佢講：「人生在世，重要个毋係
有錢，重要个係心肝肚个感受。𠊎等屋下雖然窮苦，但係人窮志不窮，毋係毋認輸！
這正係正式个幸福，每日都愛開容笑面來過日仔。」佢這種精神係值得𠊎等學習个。
佐賀个超級阿婆就係在歡樂當中帶等感動人个一本書。有人講：「再艱苦乜愛㖸分
天公爺看。」佐賀个阿婆講：「再艱苦，乜愛分天公爺㖸出聲音來。」就因為恁呢，面
對困苦生活个兩子阿婆，總還係快樂个生活。故所，𠊎等在堵著困難个時節，做毋得
失志，愛更加往好个方向去思考，再困難个事情乜會有解決个方法。
𠊎看忒這本書，想著客家人乜同佐賀个阿婆共樣，蓋煞猛打拚、勤儉持家、樂天
知命。
17 犖犖确确：音log lo g kog kog；形容簡陋。
13
100 年全國語文競賽臺灣客家語朗讀文章（南四縣腔 國中學生組） 編號 5號
【好心有好報】古美珠原作／張美英譯
俗話講：好心有好報，壞心有惡報，正經有影哦！記得舊年避暑个時節，𠊎做過
个一件好事情，這下想起來還真快樂。
舊年个避暑，𠊎去吾婆屋下尞。吾婆歇啊在莊下，屋前、屋背全係田，有蓋多蟲
仔好捉，像草蜢、蟬仔、揚蝶仔、仔，𠊎等每日在外背拈揚尾仔、打草蜢。有一日
，𠊎等又到外背搞，忽然間，𠊎看著遠遠个位所有一團白色个東西在該蠕蠕動，𠊎同
吾老妹遽遽行兼去看。哇！原來係一隻蓋得人惜个月鴿仔，𠊎跍下去認真看，原來佢
係翼胛著傷、飛毋起來了，實在還衰過哦！萬一係堵著狗仔，該就死無命了！這愛仰
結煞正好？管佢三七二十一，先將佢捉歸去正來講。
𠊎定定仔行過去，同佢輕輕仔捉起來，放到手巴掌項，遽遽歸去尋吾婆，拜託佢
定著愛救這隻月鴿仔，𠊎等係無救佢，該佢定著穩死个，吾婆看𠊎講到恁衰過，又想
𠊎恁善良、恁好心，就答應𠊎等个要求。吾婆黏時就去尋藥仔來同佢膏，藥仔膏好正
想著無籠仔，月鴿仔愛放到哪位正好呢？吾婆又帶等𠊎去街仔項，買一隻鳥籠仔，還
過飼料。
𠊎等每日同佢膏藥仔，無幾多日，佢就會在籠仔肚跳上跳下、嘰嘰喳喳。又過欸
幾下禮拜，吾婆講厥翼胛好了，會飛了，使得將佢放轉去。因為畜恁多日，有感情了
，愛放佢轉去，實在有一息仔毋盼得，毋過無法度，鳥仔愛在外背自由自在、飛來飛
去，正會快樂。故所，𠊎就帶等吾老妹，擐等鳥籠仔，去到該日發現佢个所在，打開
籠仔門放佢出去，看著佢自由飛到天頂，𠊎个心情實在還快樂。
原來，幫助人个心情係恁好啊！這就係𠊎做過个一件好事情啦！原來，做善事毋
使用蓋多个氣力同錢財，只愛有愛心。在生活裡肚，隨時就有機會來做，雖然係一息
仔良善个心，乜會分世界感受著越來越和諧。
𠊎一直都相信：「心好，命就好；心開，運就開。」毋知係毋係恁呢个緣故，該站
仔，好空个事情跈等來。最先係吾爸、吾姆阿𧩣𠊎恁好心，送𠊎一樣禮物；後來係惜
𠊎个滿姨又帶𠊎等去麥當勞食，連考試就考到拗蠻好，𠊎定著還愛做蓋多蓋多个好事
情，因為善有善報、好人自然有福報哦！
14
100 年全國語文競賽臺灣客家語朗讀文章（南四縣腔 國中學生組） 編號 6號
【阿婆个無字天書】劉敏華原作／李宜諭譯
吾屋下附近有一條盡靚个河壩，平常係無落大雨，無發大水，河壩脣就有人在該
牽牛食草，牛背囊頂就會有白鶴仔食蟲仔，該種景色蓋好看，故所𠊎不時在放學个時
節，背等書包坐在河壩脣，看日頭落山，搭看牛仔食草同白鶴仔散步。
有一日，𠊎看著該兜白鶴仔「哦！哦！」緊叫緊飛，一大陣仔飛向山該片去，無
留在竹頭頂項過夜。𠊎感覺蓋奇怪，就走去問吾婆，做麼个白鶴仔會一大陣飛啊山該
片去呢？吾婆同𠊎講：「白鶴仔飛啊山肚去，表示會落雨了，朝晨頭白鶴仔係飛對海脣
个方向，就係會好天了。」
𠊎感覺蓋奇怪，吾婆無讀過書、毋識字，但係佢麼个都知，尤其係生活裡肚養生
个知識。像吾婆蓋煞猛種菜，佢不時會講：「正月蔥，二月韮，三月薑，人就係愛食季
節菜，正毋會有病痛。」食飯个時節乜輒常講：「食飯先淋湯，贏過尋藥方。」分𠊎印
象盡深个係每年五月節，吾婆定著會摘大風草、抹草、扁柏、艾草、芙蓉、茅仔、榕
樹葉這兜，總共七種花草，同午時水，用大鑊仔煮盡香个避邪水分全家人洗身。佢老
人家講五月節洗避邪水，一年都使得帶來平安。這係佢老人家傳統个觀念。
吾婆每暗晡會去莊項个三山國王廟唱喏，堵著初一同十五，佢會同信眾共下誦經
。有一擺，𠊎問佢：「阿婆，你唸个太陽經、太陰經，係麼人教你个？」吾婆同𠊎講：
「頭擺客家人重男輕女个觀念蓋重，𠊎在屋下係長女，細細仔就愛撿樵打草，帶老弟
同老妹，哪有好分𠊎去讀書？𠊎淨知對生活裡肚个經驗記落肚，就毋會添放忒。另外
一方面，𠊎會聽人講、聽人唸，再煞猛記在心肝肚。故所，𠊎唸个經毋係別人教𠊎唸
个，完全係自家用聽，同佢記起來个。」
原來，吾婆个無字天書就係經驗同記才，人講：「老罔老，經驗係寶！」又講：「
家有一老，便係有一寶。」客家人个「敬老尊賢」定著愛傳揚下去，留來分後代子孫
有盡好个榜樣。
15
100 年全國語文競賽臺灣客家語朗讀文章（南四縣腔 國中學生組） 編號 7號
【𠊎印象最深个一堂課】黃鈺雯原作／張美英譯
𠊎從細到這下，在學校讀書有七八年久，所有教過𠊎个先生，逐個都盡會教書，
分𠊎學著盡多个知識同做人个道理。雖然，蓋多課程都盡生趣，𠊎都還記得，毋過，
係愛講𠊎印象最深个一堂課，還係舊年陪吾姆去醫院降嬰兒仔个時節，吾姆同𠊎上个
一堂課。就在該幾點鐘久个時間，看等吾姆个肚屎痛到佇毋著，到吾老弟平安降出來
个時節，分𠊎上欸一堂盡寶貴个生命課程。
原來，𠊎乜係吾姆恁呢經過千辛萬苦正降出來个！在𠊎看著吾老弟个時節，心肝
肚非常个感動，想都想毋著，一個人就恁呢出世了！就在該當時，𠊎同自家講，生命
係盡寶貴个，定著愛好好珍惜！從今以後，𠊎愛更加有孝爺哀，愛照顧好自家个身體
，毋好分佢等來愁慮正好！
該當時，吾姆同𠊎講，𠊎乜係同吾老弟共樣，幼皮白肉，面頰卵紅冬冬仔，盡得
人惜！佢講，逐個嬰兒仔都係爺娘个子子肉肉18，係爺哀盡大个希望！所有做人爺娘个
，都希望子女身體康健、平平安安个成人長大，更加希望子兒有出息，煞猛讀書，大
了做一個有用个人。故所，成時看著𠊎毋睹好跌倒著傷，無就寒著發病仔个時節，心
肝肚就盡毋盼得！係講𠊎蠻皮，講毋聽，佢還過像十二月个芥菜，盡傷心！
吾姆還講，爺娘恩情大過天，老鴉仔有反哺之義，羊仔有跪奶之恩，𠊎等做人定
著愛對爺哀賢孝！俗話講：「爺娘想子長江水，子想爺娘擔竿長」，爺哀關心子女个心
，遠超過關心自家，麼个事情都會為子女來設想，千辛萬苦个同𠊎等畜大个恩情，係
𠊎等一生人都還毋忒个！老古人言講：「生時四兩豬肉食，贏過死後一條豬。」又講「
千跪萬拜一爐香，毋當在生一碗湯。」就係同𠊎等講，平常時就愛知好行孝！
這就係𠊎印象最深个一堂課，𠊎聽欸以後，頭磬磬仔感覺盡見笑！這下，𠊎毋會
再過分吾爸、吾姆擔心同操煩，毋會對佢等堵堵撐撐，乜毋會同吾姊齬齬齖齖、冤家
羅債！還過毋會懶尸了！𠊎知好手拚掃，出門、轉屋會同爺哀講，乜蓋煞猛讀書，
作業盡認真寫。𠊎寅時卯時都會記得愛做一個知人我、知上下个子女！
18 子子肉肉：音ziiˋ ziiˋ ngiugˋ ngiugˋ；心肝寶貝。
16
100 年全國語文競賽臺灣客家語朗讀文章（南四縣腔 國中學生組） 編號 8號
【失敗个經驗】李得福原作／李宜諭譯
記得讀三年生个時節，有一日放學歸去，看著天色會暗了，𠊎就學洗米煮飯。雖
然從來無煮過飯，但係𠊎記得吾姆輒輒講：「一杯米放一杯水，洗米、洗菜最少愛洗三
遍。」吾姆講个這兜話，平常時𠊎毋會特別去記起來，唉！今晡日嗄用得著了，就像
書肚講个：「眼看千遍，不如手做一輪。」𠊎將米洗淨後，放入電鑊肚煮。
𠊎心肝肚緊愐，這係𠊎第一擺煮飯，等一下鑊仔肚个飯係煮好了，定著香噴噴仔
，特別有味緒。哪知，時間到了，鑊蓋打啊開，阿姆哀！電鑊肚个飯還半生熟，有兜
鬆鬆、有兜黏黏，全部食毋得。仰會恁呢呢？打電話問吾姆，原來就係𠊎無在電鑊肚
放一杯水，故所變到乾煮。有米煮無飯，還係尷尬，有欸這擺个經驗過後，下二擺𠊎
就毋會添放忒放水了。有這擺失敗个經驗以後，𠊎做事情以前總會多愐，多想各種可
能發生个狀況，事先考慮周全。
無愐著，恁呢細心細意，還本本會失敗。有一擺，學校舉辦跳索仔比賽，比賽个
項目有單人組、雙人組同三人組。先生推派𠊎同另外兩個同學代表班項去比賽。為著
這擺个比賽，乜為著愛拿著好成績，每日下課个時節，𠊎就會主動邀同學去操場練習
，變化跳法，轉換方向，加強練習。
到正式比賽个該朝晨，全校个學生仔都圍在操場脣，看著恁多人，𠊎心中暗暗歡
喜，因為定著會贏。心肚恁呢想，其他个事情就無閒去多加注意了。比賽開始了，因
為忒有自信，兩隻手拂索仔个力道無平均，跳無幾多下就卡索仔、停下來了。第二擺
再過跳，還係共樣失敗了。接等个雙人組得著第三名。三人組个，又因為配合毋好，
正得著第四名定定，自家壞勢啊面紅濟炸，頭犁犁毋多敢看人。
經過這兩擺个失敗，𠊎正知著頭擺人講个：「學術毋精、驕兵必敗。」乜了解著自
家失敗最大个原因，都係毋罅沉穩，忒容易驕傲，忒容易看輕天下个事情。從該兩擺
个失敗經驗以後，𠊎變到更加小心。接受任務以前，頭腦總會先考慮清楚。最重要个
係𠊎接受失敗、會記得失敗帶來个教訓。下二擺，𠊎會過煞猛、過認真行向成功之路
。
17
100 年全國語文競賽臺灣客家語朗讀文章（南四縣腔 高中學生組） 編號 1號
【人公仔】徐月里原作／張美英譯
記得𠊎讀國民學校一年生个時節，盡驚生疏。等到𠊎讀三年生該年，膽識就越來
越大了，有成時𠊎會在街路踔上踔下見見世面。有一日，𠊎著等該雙既經著有兩年、
無蓋合腳又還好好个屐仔，在市場脣个街路肚踔來踔去。
該舊街路項有一間洋品店，聽講店肚賣盡多洋貨。有賣該紅色布面、白色鞋帶、
細妹仔著个關公鞋，過年時，吾姆識同𠊎買過一雙，講𠊎讀書時節正好著。店仔面前
擺一隻使得徙停動个細糖攤仔，有賣抽糖仔个東西，乜有賣兜仔假銃仔啦、紙牌啦、
人公仔啦這兜細人仔搞尞个東西。一半下𠊎討著五角銀，就會去抽糖仔食。該日餳著
𠊎个東西，係用枋仔釘起來个架仔項吊等个該隻－－用光面塑膠紙包起來个塑膠人公
仔。
該隻塑膠人公仔蓋無共樣，厥頭那毛虬虬肨肨，目珠圓圓金金，會停動，目珠毛
翹翹，鼻公刀利利，鼻公頭錐錐，鼻公空細細，手腳幼幼長長，使得變換動作。該兩
隻手髀略略仔彎彎，使得擐東西，手指尖尖翹翹，兩隻腳長長躡腳尾19，有一雙滴滴仔
20个高鞋使得替換，高鞋呢！會企又會坐。著一領到腳膝頭个洋裝，上身胸脯大大
，腰骨細細，下身係攝幼褶个肨裙，實在還靚个人公仔哦！𠊎實在蓋想買。
頭家看𠊎企啊在擔仔前看恁久，就行上前問：「細阿妹仔，有想愛買無？歸去同屋
下人討錢來買！」該正經係驚死人个價數，你知無？𠊎愛幾下21禮拜正討得著五角銀好
買食，該下五角銀就使得買著甜甜又透心涼个清冰一支呢！頭家講該隻人公仔愛「十
七個銀」！
𠊎緊拚拚仔歸去同吾姆講，氣緲緲仔22，講都毋會清楚，還緊揪吾姆个手去現場看
。噭乜噭了，嘺23也嘺過了，𠊎舞到自家目汁濫串。吾姆講：「這下屋下哪有恁呢个閒
錢好買呢？莫過噭了！阿姆用花布仔做一隻得人惜个布人公仔分你搞。莫再噭到像食
著死雞腸樣仔，好恬了！這五角銀庰好！」𠊎毋甘願歸毋甘願，一時乜想無計。自家
乜知實在係嘺人，鼻公摸摸仔、目汁捽燥來，就恬恬仔無再過吵佢了。
19 躡腳尾：音ne giogˋ miˊ，提起脚跟，用脚尖着地。
20 滴滴仔：音did did eˋ；很小的、一點點而已。
21 幾下：音giaˊ；指次數有許多次。「幾下」為（giˋ ha）一詞合音而產生。
22 氣緲緲仔：音hi meuˋ meuˋ eˋ；上氣不接下氣的樣子。
23 嘺：音kieuˇ；吵鬧糾纏。
18
100 年全國語文競賽臺灣客家語朗讀文章（南四縣腔 高中學生組） 編號 2號
【𠊎个休閒生活】古美珠原作／張美英譯
「有閒時節唱山歌，人生毋使超過勞，貧窮富貴命注定，身體健康快樂多啊快樂
多。」這下个人因為工作蓋無閒，生活壓力大，大家歸日就勞勞碌碌，做到無閒洎杈
，大人為著愛照顧家庭，生活當中除忒做事還係做事。讀書人為著愛考一隻過理想个
學校，每日認真讀書，長透讀到有日無夜。𠊎正無恁戇，功課雖然蓋要緊，毋過生活
當中，還係愛有適當个休閒活動，分𠊎等放輕鬆正著。
這下个休閒活動有哪兜呢？像旅行、看電視、看電影、看書、運動同跋山，還有
這下最時行个騎鐵馬仔這兜。𠊎个休閒生活盡精彩哦！像𠊎好唱歌仔，無論係國語歌
、學老歌、英文歌也係客家歌，𠊎全部都曉得。唱歌仔毋使蓋好个場所，隨口就使得
唱，隨便你唱到雞毛沉落水，也係石頭浮起來，乜無人會管你，𠊎長透唱等、唱等心
情就暢樂起來了！
禮拜日，𠊎會尋吾老弟共下去學校打籃球同羽毛球，打籃球毋單淨好搞，聽講乜
使得分𠊎生到還過高哦！羽毛球个速度盡遽，𠊎就像孫猴仔共樣，飛上飛下，就驚接
毋著球仔，每擺就搞到汗流脈落，歸身仔溚溼，實在還爽快。打球仔分𠊎毋記得讀書
个辛苦，實在快樂。
人講：「花開滿園自然香，八月秋風漸漸涼。」秋天八月半邊脣最合適出去旅行，
遶山花了！放尞个時節，吾爸不時會帶𠊎等出去遶尞。𠊎盡好去河壩捉魚仔，網蝦公
，河壩水又鮮又涼，該魚仔在水竇肚泅來泅去，𠊎將鞋脫忒，遽遽跳落河壩肚，該種
感覺正經係透心涼，害𠊎每擺就尞到毋知好轉，這兜就係𠊎个休閒生活啦！
雖然每一個人个休閒生活無共樣，有人好打球仔，有人好看電影，也有人好看書
，好做麼个都無要緊，最主要愛尋隻你中意个休閒活動，來分你放輕鬆。大家在這恁
無閒个社會，毋好分工作也係功課變成若生活个全部哦！恁呢到老了，正來怨嘆就來
毋掣了！愛記得，休息係為著行還過遠个路，故所，這下無論大人也細子，大家定著
愛安排休閒生活，分自家每日輕鬆又快樂。
19
100 年全國語文競賽臺灣客家語朗讀文章（南四縣腔 高中學生組） 編號 3號
【學勤三年，學懶三日】徐子涵原作／李宜諭譯
從𠊎還盡細个時節，吾姆就不時話𠊎講：「屋愛朝朝掃，田愛日日到，書愛日日讀
。」又講：「一日學習一日功，一日無學十日空。」故所，無論學校係上課也係放尞，
吾姆規定𠊎兩姊妹，每日都愛讀書、愛運動、愛拚掃！因為緊尞緊懶尸，緊睡緊戇，
𠊎懶等人哪，學勤，愛有三年，學 ，毋使出三日哦！
毋會差，𠊎等愛經過盡久个時間，正會改忒懶尸个性格，絕對無辦法在三兩日仔
就養成勤勞个好習慣，係講毋肯做事、毋肯停動啊，兩下半仔就會變懶尸了！懶尸人
做麼个都難，連食飯都懶煮、懶食。
還記得有一年避暑，睹睹好吾姆做頭路盡無閒，𠊎想偷懶一下，一駁仔無讀書、
無運動，應該無麼个要緊，就偷偷仔看電視、搞電腦，毋係食就係搞，每日都歡喜樂
天24，生活盡享受！無想著，正幾日仔定定，就開始起懶根了，朝朝睡到日頭紅！歸日
仔流流漂漂，像閒神野鬼樣仔，一日過一日，時間就恁呢分𠊎白白浪忒去了！
到愛開學个時節，正知河壩跑馬－－壞蹄了！一大堆个事情吂做忒，無頭無䌈，
害𠊎毋知愛仰結煞正好！趕緊讀書寫字，但係，看無兩下仔个書，寫無兩行个字，就
無精神个頭磬磬啄目睡；書房乜狼狼犁犁，堆山塞海，看著就蓋懶，唉！歸個人就像
分大石牯矺著，感覺著壓力盡大。有欸該擺个經驗，𠊎正知著：「坐久變懶，睡久成病
。」這句話實在有影，確實係「學勤三年，學懶三日。」
𠊎這下毋會再過恁呢、毋敢懈怠了！自家个東西，定著會隨時收揫好，毋會儘採
亂放，𠊎會同屋下整理到伶伶俐俐，食飽飯，乜會遽遽撿揫；𠊎會規劃時間、煞猛讀
書，還會保持運動个好習慣。做事情會過煞手兜仔，趕燒趕熱去完成，斷真係「毋怕
事難，就驚人懶！」
漸漸仔，𠊎體會著老古人言講个：「人勤地獻寶，人懶地生草」、「勤人登高易，懶
人伸指難」、「勤勞糧滿倉，懶尸空米缸」、「勤勞身體好，懶尸催人老」這兜鼓勵人愛
勤勞个道理，總講，「學勤三年，學懶三日。」𠊎等个生活愛好，就愛過煞猛兜仔，只
愛耕種有用心，钁頭底下有黃金！
24 歡喜樂天：音fonˊ hiˋ lagˋ tienˊ；欣喜異常。
20
100 年全國語文競賽臺灣客家語朗讀文章（南四縣腔 高中學生組） 編號 4號
【養成好个讀書習慣】徐貴榮原作／李宜諭譯
蓋多做阿爸、阿姆个人，登常會問：厥細人仔生來蓋精靈，仰仔書會讀毋來呢？
有兜人就去廟項燒香、拜佛、求靈丹，有兜人就怪交著壞朋友，還有兜人會怪學校个
先生毋會教。大家來試想啊：恁呢，敢著？
記得頭擺讀國中个時節，一日到暗捩捩轉，想空想缺25、企坐毋忒，坐無兩分鐘，
屎胐就像生竻樣仔，企起來摸這摸該、看電視、打電動。每擺發成績單，無一科見欸
得人。有一暗晡，吾姆帶去吾姨个屋下，看吾表阿姐仰仔讀書。𠊎兩儕一入門，就看
著吾姨丈恬恬仔在廳下整理資料，吾姨在該看書，吾表阿姐同表老弟共下在該寫功課
。一下仔就分醒26過來了：厥屋下讀書个習慣恁好，難怪細人仔盡會讀書！可見讀書習
慣係盡重要个。
到底愛仰仔養成好个讀書習慣呢？𠊎看著吾姨屋下个情形，想著下背三點來分大
家參考一下：
第一、讀書心愛專，毋好花娘心27捩捩轉。人講：「心專石穿」，毋過，盡多人讀書
，一本書拿等，就像該「細和尚仔念經－－有嘴無心」，心肝肚緊想別个事情。一下仔
想搞電腦，一下仔又想出去尞。讀無兩下仔書，又分蓋多別樣个事情雜入來。心毋定
，想愛同書讀好，該就「等雞公生卵－－哪有希望」。故所，毋好同電腦、收音機、漫
畫書、好搞个東西放到書桌个脣口，恁呢，正會專心。
第二、課內同課外个事情愛分開。讀書个時間，毋好去想學校社團同出去尞个事
情。閒時閒節，無麼个要緊个事情，毋好緊打電話；每日見面，毋使用 E-mail 傳來傳
去，浪忒時間。課內同課外个時間，係無分清楚，搞又無搞著，書又無讀好。
第三、愛有計畫。時間一到就愛去讀書，做毋得先生無出作業，就毋讀書。其實
，高中生个課業蓋重，愛讀个書堆山塞海，故所，自家愛有計畫，好好安排讀書个時
間。老古人言講：「甘蔗食了一目正一目」，定著愛一步一步去複習頭擺讀過个東西，
乜愛先看天光日个科目。
最尾，𠊎想大家个頭腦差無幾多，讀書个習慣係毋好，讀書就有差，等考試到了
，就算「三十暗晡个尿桶－－盡拚」又乜難了！𠊎等還係「桐油盎仔裝桐油－－認分
」兜仔，平常時就養成好个讀書習慣過贏，字墨正會飽。
25 想空想缺：音xiongˋ kungˊ xiongˋ kiedˋ；胡思亂想或想盡辦法、動歪腦筋。
26 分醒：音funˊ xiangˋ；甦醒過來，清醒。
27 花娘心：音faˊ ngiongˇ ximˊ；不專心，三心兩意。
21
100 年全國語文競賽臺灣客家語朗讀文章（南四縣腔 高中學生組） 編號 5號
【環境淨俐个重要】徐貴榮原作／李宜諭譯
記得還細个時節，在鄉下同吾公、吾婆歇，屋頭前當闊，看著个係禾仔、樹仔、
竹頭林，青青一大片；行出去，不管係大圳、細溝，也係河壩个水，淨淨俐俐，裡肚
還有鯽魚仔、蝦公、湖鰍仔，泅來泅去，蓋得人惜。暗晡頭，雖然一哪仔烏疏疏，毋
過，兜一張凳仔在禾埕肚尞涼、聽𧊅仔聲，風吹啊來，涼沁、涼沁，蓋鬆爽。
毋過，這恁多年來，時代進步，工商發達，漸漸仔，頭擺个青山綠水毋見忒了，
看著工廠一間一間起起來後，大圳、細溝仔流出來个變到烏烏个毒水，污染欸空氣、
水源同土地，莫講魚仔，連人險險分佢跼死28！還有，這下蓋多人無注重衛生，儘採擲
垃圾，呸29檳榔汁、菸、擲菸屎；一哪仔都係油紙袋仔、保麗龍同地圾。一大堆垃垃
圾圾个東西裡肚，生蚊仔，發蟲仔，地圾又過塞到水溝肚，蚊仔同烏蠅就滿天蓬蓬飛
，環境嗄變到屙屙糟糟！生活在這種環境裡肚，人同頭牲當然會中毒。
頭擺過無恁多个工廠，人乜過無講究衛生。毋過屋前、屋背个草，長透鏟到淨淨
，熰30來做肥；食个東西係有伸，就拿去餵頭牲，毋會濫糝倒。現下，社會進步，生活
忒好了，食个、用个伸到一大擔，每日个地圾，擲到堆山塞海；大部分个人蓋無閒，
無去注意環境係仰仔﹔有兜人又蓋自私，自家屋肚裝到淨淨俐俐，社區个環境就無愛
插佢。恁呢還係無用，大環境毋淨俐、衛生差，仰毋會發病呢？
環境衛生个問題，對𠊎等个影響非常大。故所，首先希望政府、社團愛多宣傳，
多教育民眾，認識環境清潔个重要，衛生單位乜愛隨時檢查。再來，希望政府訂嚴格
个環保法律，若係有人無照規定來做，定著愛罰。還有，愛提高大家个公德心，毋好
亂擲垃圾，愛共同來維護、共下來清潔𠊎等个環境。
最尾，大家愛知：環境若係淨俐，醫院就毋使去；環境若係屙糟，病痛就歸拖攞31
！老古人言講：「窮生狗虱富生瘡，張飛又乜驚發病。」故所，無論有錢人也係窮苦人
，定著愛注意環境衛生，裝分佢淨俐淨俐，身體正會康健。
28 跼死：音kiug xiˋ；形容極悶，難以呼吸。跼，音kiug，拘束、限制、圍堵、困住，此作為悶住。
29 呸：音pi；吐。
30 熰：音eu；悶燒。
31 歸拖攞：音guiˊ toˊ loˊ；一大串、一大堆。
22
100 年全國語文競賽臺灣客家語朗讀文章（南四縣腔 高中學生組） 編號 6號
【一張相片】黃雪珠原作／張美英譯
初秋个時節，一陣一陣个涼風，吹入吾姆个間房肚，吾姆个手項，拿等這張略略
仔褪色个新娘相片，心肝肚毋知在該愐麼个心事；往事分佢留下蓋多甜蜜个回憶。有
人講：每一張相片都有一隻感動人个故事，無毋著，這張相片，又分吾姆想起出嫁時
个情景。
佢講：𠊎二十二歲該年，莊頭个阿英姑本成愛帶若爸去看別家个細妹仔。恁睹好
，該細妹仔無在屋下，佢就帶若爸來看𠊎。記得該當時，𠊎捧好茶就庰在間房肚毋敢
出去。若公同若姐婆佢等在廳下同若爸打嘴鼓，聽佢等有講有㖸，像蓋歡喜樣仔。
緣份啊！恁呢就講成這門親事了！這下想起來，實在蓋大膽。該時節，𠊎根本就
無看識若爸个面貌，乜毋知若爸个性體，更加毋知佢到底做麼个頭路，總係聽若公講
：「人老實、有食頭路就好。」毋過，𠊎知若公、若姐婆係仰仔个毋盼得，若公牽等吾
手，痛惜个看等𠊎，毋知愛講麼个正好。
討親个日仔看好了，媒人婆送日仔帖來後，若公同若姐婆就開始無閒準備嫁妝：
被骨、枕頭、門簾、衫褲、面盆、錫桶、尿桶……，還有若公親手做个簞笥32、圓桌、
圓凳、碗櫥仔。
𠊎自家心肝肚乜一頭歡喜、一頭愁，歡喜愛嫁人了，女大當嫁、男大當婚，在該
年代還係做毋得忒老嫁哦！毋過也盡愁慮，若爸个人好無？嫁過去愛做麼个呢？將來
个家官、家娘好服侍無？屋下个爺哀恁無閒，老弟、老妹又還細……盡多盡多个問題
，想著這兜，自家也會著驚哦！
日仔過欸真遽，若爸坐大車仔來討親。該當時，若爸瘦瘦高高，同厥叔伯阿哥借
一身西裝，著一雙蓋大雙个皮鞋。該時節，有錢人正有新娘衫好著，𠊎蓋幸運，睹好
隔壁醫生館个張先生討心臼，𠊎就同佢借來著，還特別請翕相師傅來翕張相片做紀念
。還過，𠊎該時又睹好同日本警察仔煮飯食，警察仔頭家人盡好，喊一輛計程車分𠊎
出嫁好坐，就恁呢，𠊎同若爸兩儕人圓滿結婚了。
看著相片肚个人，吾姆指等講：「頭前排係若公、若姐婆、若太、還有滿叔公，後
背係大舅姆，伸个就係吾老弟同老妹。」一張盡有紀念性个相片，分吾姆留下盡多盡
多个回憶同安慰。
32 簞笥：音tan siiˋ；衣櫥。
23
100 年全國語文競賽臺灣客家語朗讀文章（南四縣腔 高中學生組） 編號 7號
【𠊎个阿婆】黃瑞芳原作／李宜諭譯
吾婆過身會十年了！雖然日仔過去恁久，但係在外背看著頭那毛白白、梳啊亮亮
又整齊个老人家，𠊎就會想著吾婆。
𠊎个阿婆盡客人味，厥名仔有一隻「妹」字，在阿太降佢个時節，因為忒多細人
仔了，就同佢安到「滿妹」。𠊎還細時節，不時聽著莊項个人喊佢「阿滿姊」、「阿滿姑
」，𠊎乜跈等喊佢「阿滿姊」。人問𠊎：「若婆安到麼个名？」𠊎就會應佢講「阿滿姊！
」大家人就緊㖸。佢毋會同大家共樣用國語喊名仔，喊𠊎等兩姊妹都用客家話喊名仔
，用名仔裡肚个一隻字，加上「阿」字，像「阿瑾33仔」、「阿芳仔」，蓋多細人仔搞毋
清楚，乜跈等恁呢喊，毋過嗄同「阿瑾仔」喊做「阿滾仔」，盡生趣，又盡有搭碓。
從細，𠊎係吾婆畜啊大个，吾婆知𠊎蓋驚死、無膽，無論𠊎去到哪仔，佢都會同
𠊎共下、同𠊎做膽。𠊎讀个小學，睹睹好在塚埔脣，故所佢每日陪𠊎去讀書，陪𠊎下
課歸屋。同其他个同學比起來，𠊎感覺著特別幸福。
吾婆毋識字，無讀過書，但係了解人情世故，輒輒教𠊎做人个道理，比將講愛多
考慮別人个感受，愛尊重別人，愛多讓人，凡事都有命，係𠊎等个，早慢都會來。若
毋係𠊎等个，就算係拚命去求，乜毋會到屋。吾婆蓋樂觀，面項總會帶等笑容，講話
个聲音盡低，毋好吵著人。但係佢對是非絕對堅持。有一擺，𠊎拿毋著別人个書，嗄
帶歸屋下，吾婆發現以後，強快打電話去學校，查吾同學个電話，請隔壁阿叔帶去還
人。
對做人个道理，吾婆毋係講講啊定，佢親身去做、去實行，比將講佢做麼个事情
都會先想著別儕，蓋少想著自家。佢病到無法度䟘床，身體辛苦个時節，在基督病院
，𠊎講放「阿彌陀佛」个音樂分你聽好無？佢就講 「無愛！這係基督病院，無共樣个
宗教，莫違逆人過好！」故所，在病院，佢係自家忍等、無唉半聲、恬恬仔離開个。
唉！𠊎个阿婆，真係有修養个人。
33 瑾：音giunˋ。
24
100 年全國語文競賽臺灣客家語朗讀文章（南四縣腔 高中學生組） 編號 8號
【𠊎看三國】劉宏釗原作／張美英譯
「大江東去浪濤盡，千古風流人物。」這係宋朝大文學家蘇東坡在「念奴嬌．赤
壁懷古」肚个一句詞，講个係三國時代个風雲變化。
一起頭，會認識「三國演義」裡肚个典故，毋係𠊎讀著這本書，係𠊎還細時節，
同吾公去宮廟唱喏，看著廟方棟樑頂畫个幾幅圖當中，有一幅係三儕人摸等一頭樹仔
，吾公講該係「桃園三結義」啦！還有一個人，在大雪天，背痀痀仔企在草屋外背，
吾公講，該係盡有名个「三顧茅蘆」，越講就越生趣！將恁呢，歸去買一本「三國演義
」來看，𠊎讀去盡沉迷，毋盼得放，看忒還會尋尾哦！
讀起這本書，該就真像看電影个樣仔，有聲有影、有人物有動作，有心理有戰術
，各有千秋，像「三英鬥呂布」、「孔明借東風」、「子龍救後主」、「關公刮骨讀春秋」
這兜，故事精彩、對話活潑，真係百看不厭。
𠊎盡愛看个就係「張飛喝退長板橋」。你看佢，豹頭面烏烏，目大銅鈴鼓，鬍鬚撐
天！手擎一支丈八矛，一個人企在橋頂，堵等百萬兵馬，敨一下大氣，胸脯一脹，大
喊一聲，人講：「有鬚比鬚，無鬚比肉」，該曹操歸糞箕个草蛇，哪當得張飛這條番
檨庰34呢？百萬兵馬中有一儕，驚到對馬背上跌落來。全軍面壢青35，轉身毋掣了。張
飛一儕人，無費一兵一卒，戰退百萬曹軍，千古流傳。
老古人言講：「千里路長幾隻字，十萬兵馬兩三行」，三國演義這本書毋單淨係各
路人物个權力相爭，腦力計謀盡出，朋友敵人並毋分明。可以看出一個人个青春歲月
、一陣人个恩恩怨怨、一個時代个翻翻轉轉，所有人生百態，人情冷暖，都寫啊蓋入
味。
千年古事如在眼前，𠊎輒輒就看去手揢拳頭，腳踏馬步跌入書肚，同該三國人物
騎馬打仗去了，難怪蘇東坡會講「多情應笑我啊、應笑我！」
34 番檨庰fanˊ son biang：又稱遮仔節，身體黑白相間，華語稱「雨傘節」。
35 面壢青：音mien lag qiangˊ；因驚恐而臉色發白。
25
100 年全國語文競賽臺灣客家語朗讀文章（南四縣腔 高中學生組） 編號 9號
【𠊎个隔壁鄰舍】黃詩婷原作／張美英譯
人講：「近鄰贏過遠親！」確實毋會差，𠊎等生活當中，盡多事情無辦法單人獨馬
去完成，需要隔壁鄰舍來手，故所，歇在上家下屋36會相照顧个社區，係盡幸福个。
歇在吾上家个人，大人細子都盡良善，對人盡好。該做阿婆个，堵著熟事人都係
開容笑面个相借問，看著生份人，乜會同佢頷頭，打招呼！佢兩公婆，無論莊肚麼人
屋下做好事、也係歪事，無就廟項做鬧熱，都會義務踏過去手，對上鄰下舍乜蓋親
切，蓋有人緣，大家都盡好同佢等打嘴鼓。厥倈仔、心臼盡賢孝，畜个細人仔，講話
細聲細義，蓋有禮貌，盡知人我、知上下，分大家盡阿！
歇在吾屋下對面个阿婆盡煞猛種菜，逐日臨暗仔都會去菜園淋菜，佢講，自家菜
園種个菜無農藥，又盡萋，食起來過安心！故所，每擺有收成，都會送菜分𠊎等煮來
食。
斜對面个阿公盡樂天，生活態度係「手痛好過家，腳痛好繡花。」輒常會看得著
佢在禾埕項，坐啊在矮凳仔鋸弦仔、唱山歌，分人聽著盡爽快，無愁無慮！下把仔，
𠊎乜會跈等吾公過家去厥屋下泡茶、尞涼，聽佢等講古，感覺著盡生趣，分𠊎體會著
「敬老得福，敬禾得穀」个道理。
毋過，歇在吾下屋个人，煩惱過多！兩個倈仔盡毋聽教、毋像人，兩兄弟歸日仔
吵吵鬧鬧，冤家羅債，惡擎擎仔，還長透相打泌背。做爺哀个講無兩句，佢等就頸偏
偏仔、眼豺豺仔，像愛食人樣仔，連厥爸、厥姆都毋敢管教，輒常譴到胲滿肚飽，正
經係「敢死，閻羅王都驚。」毋單淨影響著莊肚个安寧，大家乜心寒膽顫。堵著恁呢
个鄰舍，實在愛有相當个度量。
除忒該家人，𠊎个隔壁鄰舍大體都會互相照顧，放尞日出門，乜會手掌屋。逐
禮拜六朝晨頭，還看欸著蓋多義工阿伯同伯姆，擎等掃把同糞斗，在該掃大路、拚垃
圾、清水溝！表現出大家團結合作、愛護社區个精神！若係莊肚辦活動，廟坪做大戲
、打醮、迎神做鬧熱个時節，大家會同心協力、互相幫忙鬥鬧熱。
36 上家下屋：音song gaˊ haˊ vugˋ；鄰居。
26
100 年全國語文競賽臺灣客家語朗讀文章（南四縣腔 高中學生組） 編號 10 號
【阿公同𠊎】陳志寧原作／李宜諭譯
在吾屋下，𠊎算起來係吾公个大孫仔。屋下人都講，雖然𠊎有阿姊，毋過佢下二
擺會嫁人，故所，使得留在屋下个、最大个人係𠊎。
可能係恁呢个原因，吾公在𠊎還讀小學个時節，佢就盡好帶𠊎去河壩網魚仔。離
吾屋下無幾遠，就有一條河壩。吾公講佢同吾爸兩子爺，對蓋久以前就在該河壩脣掌
鴨仔、網魚仔，一家人使得講係該條河壩畜大个。
到這下，𠊎既經讀高中了，吾公共樣盡好尋𠊎共下去河壩網魚仔。𠊎這下，人過
大了，使得同佢𢯭手背網仔，擐魚䉂仔。愛過河壩个時節，乜使得自家泅過去。毋像
𠊎還係細人仔該下，佢愛自家背網仔、摜魚䉂仔，過河壩又愛同𠊎𠖄啊肩頭頂。實在
係加清苦就有。
吾公盡好在食夜過後正去網魚仔。佢講夜欸魚仔加蓋毋好停動，過好扭。在該暗
摸摸仔个河壩脣，麼个都無。係堵著無風个暗晡，佢無張網出去，河壩就恬靜到連月
光徙步个聲都聽欸著。有時節，吾公愛交代𠊎事情，無聲無氣就在𠊎个脣項出現，𠊎
三不二時都分佢嚇到面壢青37。
網到𤸁了，佢會跍在河壩脣菸，目珠看等菸飛上去，耳公聽等水肚个聲音。等
到佢同菸忒，手腳盡遽个佢，又同網仔收好了，等到𠊎看著菸屎火星在地泥項个時
節，佢早就同網仔裡肚个魚仔搐出來、喊𠊎過去拈魚仔入魚䉂仔了。
佢不時在逐魚仔个時節，同𠊎講做人个道理。佢總係教𠊎，對大人儕38儕定著愛有
孝，去學校定著愛聽先生个話。就像佢，愛食个、愛用个東西，定著愛經過自家手仔
打拚出來，毋好去掣人；愛老老實實个做人，下二擺正使得分人看欸起。有閒，係自
家有才情，就好好讀書，下二擺在社會做一個有用个人，正毋會枉誤爺哀个栽培。
聽佢講道理會蓋煩，但係愐著在𠊎還細个時節，佢就蓋惜𠊎，𠊎就想著盡無應該
！講實在个，在𠊎這讀高中个年紀，還有一個目珠金金、耳公利利个阿公來同𠊎講道
理，係盡幸福个，吾心肝肚知佢係為著𠊎好！下把仔，𠊎測著吾公邀𠊎去網魚仔，其
實毋係正式愛網魚仔，佢怕淨愛𠊎同佢共下尞定定。愐著這兜，世間還有麼个比這種
日仔過幸福个？
37 面壢青：音mien lag qiangˊ；因驚恐而臉色發白。
38 大人儕：音tai nginˇsaˇ；長輩。
27
100 年全國語文競賽臺灣客家語朗讀文章（南四縣腔 教育大學組） 編號 1號
【都市同鄉下个比較】廖惠貞原作／張美英譯
「青菜魚肉，大戲小曲，各有各个特色。」就像都市同鄉下共樣，𠊎兩樣就愛。
在都市，人多、車多、污染多，大人細子無閒洎杈，像極樂仔樣仔轉無停，隔壁
鄰舍像生疏人，相堵頭39也毋會相借問。毋過，都市交通利便，𠊎歇在街路項，三步一
細店，五步一大店，買東西蓋方便，毋睹好寒著、發燒，行五分鐘就有醫生館。愛出
門，無論係坐公車也係捷運，有一張悠遊卡，愛到哪就到哪，實在利便。平常時，因
為都市肚車仔恁多、會塞車，吾爸都係騎奧多拜40載𠊎摎吾老弟去讀書，若係出遠門遶
尞正會駛車仔，成時停車仔無利便，一兩擺會坐計程車。
雖然鄉下無恁利便，但係這下資訊發達，利用網路尋資料、買東西，共樣係「三
下钁頭兩糞箕」一下仔就好勢了，無麼个差別。
吾爸知𠊎摎吾老弟好運動，放尞日會帶𠊎兜去河濱公園騎腳踏車，一半下會摎吾
老弟打野球，因為佢驚𠊎兜會變成飼料雞！無麼个地方好運動，係歇在都市个壞處。
無論係放尞日也係避暑，𠊎盡愛歸屏東佳冬吾婆个老屋尞。吾婆知大家愛歸來，
早早就舂粢打粄，雞捋鴨，摘蕹菜、番薯葉同高麗菜這兜，等𠊎等歸來食。吾公種
个菜，無洩農藥，味緒甜又營養。吾爸同吾老弟盡好跋樹仔拗牛眼同荔枝，每擺𠊎都
在樹下承。吾老妹同吾婆手煮食，煮到豐豐沛沛一張桌，伙房屋个叔伯兄弟乜會來
尞，一家人有講有㖸，親暱暱仔，正經係「人親、土親！」
前年吾叔討姐仔，伙房屋个人全部來手，「人多好做事」、「一人有事大家忙，一
家有事大家幫」，看欸出客家人跈眾41个人情味。吾公豬公拜天公，每家人都分一料
豬肉擐轉去。「親戚就像鋸仔，你有來、𠊎有去。」「分人食、傳四方，自家食、庰屎
缸。」愐起來，這兜都係鄉下人个人情味。
𠊎愛鄉下个人情味，乜愛都市个利便，都市同鄉下來來去去乜蓋習慣。「人心係知
足，到哪仔都幸福！」
39 相堵頭：音xiongˊ duˇ teuˇ；遇到、見面。
40 奧多拜：音oˇ do baiˋ；摩托車；機車。源自日語之外來語（オートバイ）。
41 跈眾：音tenˇ zung；跟隨大家一起從事某些事，亦即隨和、好相處。
28
100 年全國語文競賽臺灣客家語朗讀文章（南四縣腔 教育大學組） 編號 2號
【故鄉个桐花雨】邱湘雲原作／張美英譯
還細个時節，長透跈等吾姆上山頂斬竹仔，竹仔在農家生活係盡好用个東西。吾
公同佢削到細細條做竹篾仔，自家編竹籠仔來關雞子；吾姆將佢插啊在菜園肚做菜瓜
也係荷蘭豆个棚架。吾姆著等花袖在該斬等竹仔个時節，閒閒在脣項个𠊎，就頭臥臥
看天頂、看樹仔。「該係麼个花啊？」白白像雪樣仔，一團一團仔在高高个樹仔頂項，
正看著个時節，還覺得係昨暗晡天頂跌下來个星仔，感覺得係春天吂融忒个落雪，也
係飛了、歸群仔企啊在樹頂轉擺个白鶴仔，詳細看正知：原來該係油桐花。
正發現著佢，佢嗄一蕊一蕊个在風裡肚跌落，跌落地泥个時節，一息仔聲就無，
毋過𠊎注意著佢了！一蕊、兩蕊、三蕊……恁多蕊，有風个時節最靚，看佢像著等白
裙仔跳舞个細妹仔，在清風中轉一圈、兩圈；無風个時節乜毋驚，直直飛下來，還像
參加體操比賽个選手，連滾帶翻過後直線企等。「該係桐花！」吾姆一出聲，𠊎正知，
原來𠊎看戇忒了，毋知幾時，吾姆將斬下來个竹仔捆好了，過多个該把留分佢自家，
過輕个分𠊎，兩儕就拖等竹杈仔下山。就在這桐花紛飛个山路項背行過，行過个地泥
兩片都係桐花个腳跡，𠊎个腳步毋多知仔就放輕了，越行越慢，因為毋盼得將跌下來
个桐花蹬到爛爛啊！
一蕊細細仔个花，對葉仔中央肚跌落到𠊎个肩頭項，拈起來一看，五垤白色个花
瓣，就恁呢簡簡單單，中央係紅色个花心，一時之間，𠊎想起頭擺時代一片真心、守
貞節个細妹仔……。
遠方山林間个聲吵醒𠊎－－「句膏乖42」、「句膏乖」啊！係竹雞仔啦！喊到恁大聲
！響遍滿山頭。毋過，雖然知佢在樹林裡背肚，嗄從來毋識看著佢个影跡。竹雞仔到
底在哪？就在該片深林裡背！𠊎聽欸著，嗄看毋著。
記得係五月時个臨暗仔，看等天就會烏了，吾姆講愛多摘兜仔粽葉來包粽仔。無
幾久，天頂就落起雨毛仔，還來毋掣轉身就越落越大，「煞煞轉！」兩子哀使得抵水个
，也伸著頭那頂个笠嫲定定。
幾下43年以後，每擺一落雨，在外鄉个𠊎就會想起家鄉後山个「桐花雨」。頭擺个
詩人心肚自有一片桃花源，原來在吾心肝肚，也種欸一叢桐花樹，不管𠊎行到哪位，
行到幾遠，心中總會想起，該像雪花共樣个油桐花，就在𠊎个心頭飛啊飛欸。
42 句膏乖：音gi goˇ guaiˊ；竹雞的叫聲。
43 幾下：音giaˊ；指次數有許多次。「幾下」為（giˋ ha）一詞合音而產生。