110年全國語文競賽客家語朗讀文章高中學生組（四縣腔）
編號1號
【遠方个人客】劉玉蕉原作
毋知對哪日起勢，屋簷下恬索索咧！打早，大門吂開，心肝就掛吊等該烏烏个身影，會入目珠來無？地泥下有屎好清無？門一開，探頭看著个係失望，𠊎等啊等，日頭定定仔徙步，晟到戶檻0來吔，空空个鳥竇，等毋著厥主人，𠊎，等毋著吾人客。
春天，係造物者變奇術个季節。空氣裡肚還囥等有寒天个味緒，過較多个係春天个燒暖，清風撩人，在榮榮个花、嫩嫩个葉莖之間流連，蜂仔同蝶仔也跈等歡喜採蜜！佢帶來生命，該，係毋係乜會帶來遠方个人客？𠊎日望夜想，出入大門時節，總會探頭看一下仔，祈求該遠方个人客，千萬毋好毋記得自家个舊竇。
一陣啾啾滾个聲音對屋簷下傳來，歸屋下人縱0等出去，頭臥臥仔看該熟事个身影，舊年个燕仔倒轉來吔，就停在佢兜舊年結个鳥竇項，兩粒烏烏个頭那探出來，四蕊目珠同𠊎兜對看，算係相借問咧！𠊎兜有同老朋友見面个歡喜，佢兜用亮亮个啾啾聲來回應！過後幾日，屋簷下異鬧熱，觜項銜泥个烏影，咻啊出0、咻啊入，舊竇个上層，緊沿緊大、緊結緊高，會揬著天篷哩喲，阿姆講：「愁麼个，佢兜毋會比你較戇啦！」係唷，在恁遠个所在都尋得著路來轉、會起屋歇，還毋會分佢屙下來，𠊎正經輸悿悿哦！
拶腹个鳥竇結到差毋多吔，日時頭兩隻燕仔輪流飛出去絡食，夜來一隻在竇肚，一隻跍在竇脣。阿姆講：「佢兜輪等在該孵卵哦！」正經，成半個月過，就聽著幼幼仔个細燕仔聲咧，總共有四隻，鳥公同鳥嫲出去尋食該下，佢兜會乖乖在竇肚等，一聽著爺哀銜蟲仔轉竇个聲說0，嘴就擘大大搶愛食，做爺哀儕个一輪過一輪0飛出飛入，四張嘴像無底深坑樣仔，逐到都嘴擘到大大啾啾滾討食，怪奇个係，爺哀仰會知哪隻餵過、哪隻吂食？
細燕仔生幼毛吔，媸媸个頭那殼不時弄啊弄欸探出鳥竇來，鳥公、鳥嫲跈等日頭个腳步還係飛出飛入，無閒洎杈。細燕仔日日大，圓身个幼毛對灰色慢慢轉做烏金个翼毛該下，鳥公、鳥嫲就會半拐半監佢兜學飛，這時節屋簷下盡鬧熱，乜係𠊎兜盡歡喜个時節。定定仔，這竇細燕仔自家會絡食哩，就恁樣生命過再循環一到，生生不息。感謝這竇燕仔，分𠊎兜體會著生活中个生趣事，同時乜感受著有阿爸阿姆守顧个幸福。
110年全國語文競賽客家語朗讀文章高中學生組（四縣腔）
編號2號
【跌米籮】李秉璋原作
雖然講一分打拚，一分收成，毋過對耕種人來講，較多个係看天食飯！順風順雨大豐收，盡歡喜，毋過若係堵著無價，該就無採工哩，價數便宜到像狗屎樣仔無人愛。若係堵著天旱、禾熱病0、做風搓，做一下都無好收成，該就當慘！天時較熱，乜愛去田坵仔煞猛做事，大粒汗、細粒汗潑潑跌0，對後生拚到老，對打早做到斷烏0、做到看毋著人个面容仔，都係為著想愛有較好兜仔个生活。故所，對海脣到平洋，滿哪位都有廟，分百姓个心靈有一個寄託个所在。
水汴頭0，一個樸實个詔安客莊。佢兜个祖先在清朝康熙0時代就過來臺灣，在這位生活。為著求平安，望著好收成，這個莊頭有一個流傳百過年、當特別个風俗──跌米籮。講起米籮，係頭擺耕種人定著都用得著个，無論係㧡穀、㧡菜、㧡番薯、㧡番豆都用得著。水汴頭个崇賢寺逐年个正月半這日暗晡，歸莊頭个人都會來到崇賢寺。起頭，大家先來跌爐主0還過四個頭家，負責今年莊頭神明个頭路，續下來就係跌米籮，問觀音佛祖莊頭今年个運勢。
頭擺，莊項个人係在爐主屋下跌米籮。大家同神明祈求保護歸莊頭平安，續下來在香爐面用壽金點火摎米籮過火，淨化米籮。過吔主祭个人會同神明說明這下愛問个係麼个，續下來過用點火个金紙在米籮个內緣幾下輪0，就吩咐人拿去屋後背，大力向天墀坪0擲過去。米籮飛過屋崠，向前跌落天墀坪，緊碾緊碾，老老嫩嫩、大大細細摎坪仔尖到淰淰，大家都萬分期待个等結果。
輪過來个米籮係開口向天，就係代表來年運勢會好、會豐收；米籮係倒覆0，就係欠收；米籮若係半橫0，就係半好半壞。早期用二十四節氣來問，現時係用舊曆月份來問，先問莊頭个事情，比論講：「正月十五來種早冬禾，好無？」像舊年，就跌出尾冬番豆，大暑前好、大暑後半收；玻璃菜，七月好、十月毋好這兜。人有流年，農作物个時節乜有好壞，莊肚个老人家講跌米籮出來个結果就係「神明个指示」，代表種菜个流年。跌米籮代表先民在艱難時代求生活、求神明保護，用跌米籮代表千千萬萬个希望，逐個飛過屋崠過來个米籮就代表一個希望，希望一屋下人都平安、來年豐收好過日仔。
110年全國語文競賽客家語朗讀文章高中學生組（四縣腔）
編號3號
【旅行】林貴珠原作
這個時代每一儕人都有旅行个經驗，對有兜人來講旅行單純就係放鬆心情，乜有人認為旅行做得同壓力放忒佢；對𠊎來講，旅行係人生最有價值个投資，𠊎想愛去看𠊎落泥以外个世界。人無旅行過，毋知世界有幾大；無冒過險，毋知好痛惜自家个生命。旅行同人生共樣，你會緊堵著生份人，對生份到熟事，再對熟識轉到生份。你係去到外國，同無共樣國家个人相識過後，你會發現著：原來兜生活个空間恁細，外背个世界還有恁多毋識聽過、毋識見過个人同事物！正會感想著，原來人生乜做得恁樣過！𠊎想一哪仔去旅行，增廣見聞、寫出無共樣个人生劇本0。
𠊎緊想等愛去蹶一座高山，就同老公參詳，決定在日本換新年號个時節去蹶三千七百六十六公尺高个高山。六點天曚光仔，全世界想愛熟事佢个人，在山神廟前祈求一路平安、順序，做登山个準備：買食个人、翕相个人，濟濟踅踅0、鬧熱煎煎仔。涼涼个山風，柔柔仔吹過每一儕人个面頰卵，歡迎大家來到這位遶尞。大家用快樂个腳步蹶到半山排，山仔也脫忒青溜溜个身裝，換一身豬肝色个火山石禮服來迎接大家。下晝四點，𠊎兜就蹶到三千兩百公尺高來吔，在翕熱个七月天，山頂个溫度係零下兩度定定，大家就先入到山屋休息。
半夜十一點半大家過出發，去蹶最尾一截山路，星仔同月光來做伴，𠊎牽等你、你揪等𠊎，大家互相扶持蹶上日本最高个高山，該時節，大家早就汗流脈絡。企在山頂看往下0，山風颼颼滾0，彎彎斡斡个上山路，變做一條金若若仔0个龍，纏等山崗鑽入雲海。臨天光邊仔，大家耐等0冷風，等等日頭泅出雲海。一下仔時間，日光就同大地照到光光光，晟眼到人个目珠強強會擘毋開。日頭著等啾紅个禮服同大家擛手講恁早，每一儕人都感動到目汁同汗水分毋清楚，這係𠊎這一生人看著最闊、最遠、最餳人个景緻！大家在火山口一輪0過後，就滿足个下山，完成咧這擺艱難个挑戰。
旅行个重點毋係愛去幾多地方、看過幾多風景，係旅行轉來過後，自家有麼个改變？有兜个風景，你係無企在高高个地方來看，毋知佢哪餳人；有兜个路，你係無去行過，無法度感受著佢个靚。每一擺个旅行都有厥个意義，對𠊎來講，係透過旅行尋著真實个自家；旅行分吾个生活改變盡多，無論係對旅行个看法，或者係對人生个態度，旅行係一種拂毋忒个甜蜜回憶，盡餳人尋味。
110年全國語文競賽客家語朗讀文章高中學生組（四縣腔）
編號4號
【講毋出个心頭痛】曾秋梅原作
吾屋下耕種大，爺哀逐日做到兩頭烏，吾姆愛去田坵仔做事，就會喊𠊎去尋阿明叔尞。𠊎最毋好尋阿明叔尞，因為每擺同佢講話，佢淨會同𠊎緊笑，嘴咿咿哦哦緊講，𠊎聽無半句，比手畫腳𠊎又看毋識。無法度，阿哥阿姊佢兜去讀書吔，伸著𠊎這隻吊尾錘，高不將同阿明叔共下尞。
阿明叔雖然講該咿咿哦哦無人聽得識个話，毋過佢盡煞猛，打早先牽牛仔去食草，食到差毋多時間，會同牛仔逐轉來交分吾爸去田坵仔犁田。臨暗頭會起火煮飯、暖燒水，同燒水擐到浴堂分𠊎兜洗身，又還會泡神茶去廳下點香奉茶。吾婆有恁煞猛又體貼个倈仔，佢還係盡少開懷大笑，額頭總係鎖緪緪，心肝肚有一隻結。
聽講阿明叔會啞忒毋係天生个，佢兩歲个時節還盡好講又好搞，係一個活跳精靈个細人仔。阿明叔會啞忒个原因，主要係吾婆佢兜該央時个時代。客家婦人家毋知係煞猛抑係命歪，早早䟘床煮飯、餵雞鴨、洗歸家人个衫褲，還愛𢯭手做田項个事頭。食飽晝，想愛眠一下仔0都無法度。先同晒燥个樵草、衫褲收起來，再同衫褲摺好勢。㧡火灰去田坵仔，順續仔割一擔豬菜轉來煮汁餵豬仔，還愛遽遽煮飯赴歸家人食夜。等到碗筷撿揫，洗好身，既經𤸁到無精神去搭細人仔咧。
醫學還無恁發達个年代，生活苦，大家个三餐都顧毋揫，身體無爽快，哪有閒錢去醫院分先生看，便藥、草藥罔食，愛等到該兜藥仔食毋著、病到傷重0咧，正會拜託先生來屋下看。
有一日打早，還係細人仔个阿明叔軟怠怠仔又合眼擘擘仔無停動，吾婆摸著阿明叔發燒，隨手對壁項吊等个藥包仔，拿一包「阿不多」分阿明叔食。毋過到晝燒都還無退，高不將帶阿明叔坐三輪車去屏東河南醫院分福盛先生看。唉！「三鬥四毋著，行船堵著對頭風」，福盛先生出外去同人看病吔。
阿明叔就恁樣燒過䢍0，對該下起勢，阿明叔就聽毋著也毋會講吔。見擺係聽人講著阿明叔恁精靈可惜係啞仔，就會刺著吾婆長時間囥在心肝肚个苦、無人知个痛！
110年全國語文競賽客家語朗讀文章高中學生組（四縣腔）
編號5號
【粄圓情，爺哀心】徐熏娸原作
人生，總會有一種味緒恬恬仔囥在心肝窟陪等過日仔……。
從細𠊎就歇在白石下个山峎背，茅屋、泥壁分屋下人遮風抵雨過生活，戶檻0、籬笆掌等𠊎無愁無慮个童年，這種家境係𠊎記憶中最靚个一扇景色。
該係民國五、六十年臺灣民生經濟正起步个年代，爺哀連連續續降七、八個細人仔，在恁艱辛个環境愛同子女牽成到大，實在無恁該！還記得，見擺食飯阿姆就會講：「細人仔有麼个食麼个，番薯籤準飯划，天生天養乖乖大。」又講：「飯糝划0淨莫打爽，座粗無座爽。」這兜話從細聽到大，𠊎毋單止聽入耳還聽入心，一路里來養成痛惜食物个好習慣。
家境貧困个日仔，閒時閒節細人仔哪有零星錢買零嗒來食！愐起來，𠊎盡望就望過年過節打粄仔个時節，目勾勾仔望等阿姆去米店糴0糯米轉來、目金金仔看等阿姆浸米、眼晶晶仔看等一圈又一圈白鮮鮮个米漿對磨石觜流入粄袋肚，𠊎看到胲哊哊仔0——口涎水緊吞，就緊問阿姆：「還愛幾久正做得亼粄仔吓0？」佢總係笑笑仔應：「戇嫲！細人仔有耳無嘴，恬恬看！」戇戇个𠊎就恬恬看阿姆拿紅索仔，摎裝好米漿个粄袋放在長凳板䌈緪、矺畀燥，等過半晝邊仔，阿爸就會同細人仔喊兼來𢯭手亼粄仔，佢一手、𠊎一手，毋使幾久，粄仔就亼好吔！再你一粒、𠊎一粒，一下工一毛籣就裝淰大粒細粒个粄圓。還記得逐擺挼粄圓，阿姆就會講：「惡手毋當兩0！」該央時毋知頭天个𠊎，總係會跈嘴尾唸，嗄毋知這句話蘊含麼个人生个道理，等到自家成家立業後，正知得這句話原來囥等一種味緒。這種味緒有爺哀教𠊎「挼粄圓」个人生味！
𠊎認為粄圓愛好食毋單淨愛真材實料、鹹淡愛堵好，盡要緊个係共心个溫情，用手工挼出來个粄圓特別有味緒、特別餳人食！想來，人生，就像粄圓共樣，愛磨、愛矺、愛亼、愛挼、愛有鹹淡，正有味緒！逐粒粄圓裡肚就會囥等每儕人佢最寶貴、最值得珍藏个溫情，肯磨、肯挼，煞猛打拚總會換來自家盡好个人生，不管係鹹、還係淡，在在就係「圓滿」。
110年全國語文競賽客家語朗讀文章高中學生組（四縣腔）
編號6號
【搞頭王】曾秋梅原作
放尞日，天曚光仔，細人仔就會分大人喊䟘床，去田坵仔𢯭手割田脣草、掌牛仔，無人敢搵在眠床。無細人仔搞个禾埕，恬靜到連狗仔乜懶拐拐仔，搵在花樹頭下啄咕0。毋過當晝一過，歸禾埕仔都係細人仔在該搞，唩唩喊喊，吵到屋頂都會掀忒。
阿正係有名个搞頭王，當晝頭老人家愛睡當晝，佢就偏偏愛同一大陣半大細仔个細人伴仔在禾埕項搞球仔，你攉過來、𠊎擲過去搞到當暢樂。球仔係無生著目珠擲到叔婆厥屋下，該就艱辛哩！叔婆斯係惡到有名个，阿正天毋驚地不怕，就淨驚叔婆定定。有一擺，佢躡等腳尾0入去尋球仔，無想著叔婆扐等球仔、齧牙齒0大聲罵：「你這兜細孲仔摝死人，分人睡一下當晝都毋得，球仔破忒去，看你兜愛搞麼个！」阿正嚇到面呷青，瀉一路出，企在屋簷下，噥噥哢哢閼到腳緊蹬。
臨暗頭，阿正就湊大家在禾埕搞囥人尋。伙房屋像老鼠窿，𠊎兜細人仔舂上囥下，驚分人尋著連糞缸乜走入去囥。阿正膽識盡大，跳入豬欄裡背囥，無細義嗄跺著豬子，豬子痛到吱吱滾0，阿正嚇到飆出來，好死毋死徑著豬篼嗄橫著，額頭搉著豬欄起一隻瘻，分厥爸打到喊毋敢。
熱天个時節，莊下个細人仔盡好去河壩搞水，搞啊搞欸，毋使使錢就學會泅水仔吔。西北橋下个河壩水係三合水0，三合水會合个地方就會形成波螺皺，係對峎頂看啊下盡得人驚哦！
有一日，阿正又湊等大家去河壩洗身仔，該央時，細人仔去河壩搞水大家都同衫褲脫淨淨在河壩跳上跌落，無麼个好見笑个。大家搞到當興頭个時節，阿正對橋頂煞力牯飆啊下，唉哉！「四溝水0人蹬牛屎——的準0」，嗄飆落波螺皺裡肚毋見忒！共陣个細人仔驚到大聲喊：「救命啊！有人沉忒吔！」好得阿正个命恁靚，該時節堵好有一個在河壩脣掌牛个後生阿哥，佢聽啊著有人喊救命，牛索一放，煞煞飆入水肚，同分波螺皺唶入去个阿正救起來。
人講：「大難不死，必有後福」，搞頭王阿正出社會了後，正式在臺北做頭路賺盡多錢，對莊項个修橋舖路出錢盡大方。還過對救厥命个恩情人，過年過節定著會大擐細擐去厥屋下答謝，無一年識跌忒過。
110年全國語文競賽客家語朗讀文章高中學生組（四縣腔）
編號7號
【蕨】張美容原作
前駁仔，𠊎兜兄弟姊妹帶阿爸、阿姆去北埔尞，順續仔食客家菜，阿姆笑等講：「若爸比細人仔還較揀食，愛請佢無恁容易！」該載，該日个菜還算合厥个口味，佢盡中意个係一盤炒蕨，青溜溜个蕨，面頂一粒淰黃0个卵黃，看著就當餳人。「還久無食著蕨吔！頭擺飯桌頂毋打眼0个菜，這下愛來到餐廳正食得著。」阿爸个話，摎𠊎兜兄弟姊妹帶轉多年前个童年。
細人仔時節，𠊎識跈阿姆去摘蕨。水脣、山邊一哪仔就有，毋過，毋係逐種蕨就食得得，阿姆緊摘緊教𠊎選。毋過蕨个種類當多、生到又當相像，𠊎認毋得出，見摘一皮就愛問：「著無？著無？」阿姆分𠊎問到無耐心講：「若目珠摎𠊎換豆豉，𠊎就無愛。」蕨摘轉來，阿姆先燙過，正拿來加兜仔覆菜、薑絲共下炒，覆菜个甘味摎蕨盡合，這係俚客家人最平常个食法。
有一種蕨，盡得細人仔个心，該就係「金狗毛」0。佢个「根莖」會生軟軟、絨絨、金金个毛。生理人摎金狗毛个葉仔剪忒，留下四支大約五公分長个葉柄，晒燥後顛倒轉來放，加兩粒假目珠，就當像一隻生金毛个金毛狗。記得頭擺跈阿姆去獅頭山尞，就有人在路脣排等賣，老弟噭等愛買，買轉來後，一哪仔在人面前展。有人講金狗毛个金毛做得斷血，毋過老弟毋盼得分人挷兜仔來試，毋知有影也無影！
「喌、喌、喌」0一陣細人仔對等山腳下个「雉雞卵0」緊嘍緊挷，大家相信，雉雞卵生在地泥下个「卵」，愛喌喌滾嘍正挷得有，故所又摎佢安到「喌喌卵」，莊下个細人仔會挷來準零嗒食。在該無麼个零嗒好食个年代，係無嘍著喌喌卵，該種打爽、失望个心情，係這下麼个東西用錢買就有个細人仔無法度體會个。
一盤菜帶分𠊎兜兄弟姊妹講毋煞个話題，𠊎兜个子女像聽古樣仔，有兜毋信、有兜試著好笑，唉！兩個世代、兩種生活；兩個世代、兩種心情。
110年全國語文競賽客家語朗讀文章高中學生組（四縣腔）
編號8號
【漚雨】張美容原作
恁久來，逐暗晡个落雨聲，總係像躁光0个細人仔，在𠊎半睡半醒个夢中，噦噦嘶嘶0、串上串下，無一夜有好恬靜恬靜睡目。想起頭擺人聽著雨打芭蕉个聲音，心肝肚就愁愁慮慮，𠊎這下還聽著水打在水篷0頂，叮叮咚咚、淅淅錫錫个聲音，吵到人日夜煩躁、食睡毋安，比較起來，𠊎還係較羨慕古人。
夜夜落雨就算吔，連日時頭天一光擘開目珠，就看著滿天个烏烏暗暗，聽著个本本係博人惱个水聲，心情跈等就慍悴起來。在這又溼又冷个天時出門上班、讀書，一路塞車，為著赴時間，大家就少忒耐心，「叭！叭！叭！」个喇叭聲響無停，弄上弄下0个奧多拜，危危險險，一下無細義，還會分路過个車仔洩到一身泥漿水。天時毋好，心情跈等毋好，大家完全失忒好天時个平靜摎忍讓。
雨漚無停，𠊎心肚盡痛个係原本屋前、屋後開到鬧鬧0、靚靚个玫瑰、海棠、櫻花，分水涿到溚溚跌0，實在還打爽！毋過，最難為个還係婦人家，因為漚雨，衫晾到無位仔好晾，一屋溼溼溚溚，拚掃也毋方便，細人仔日日關在屋下，拐就拐毋核0，實在辛苦。老人家本來在冷天時做得出去晒啊日頭、打下嘴鼓，這下因為漚雨，僅可坐在屋下啄目睡，乜當毋慣。盡得人畏个還係菜錢，青菜因為漚水綿忒，動啊著就起幾下倍，水果乜係貴參參仔0，買毋落手。生理人也怨怪，冷颼颼个落雨天，打狗就毋出門，生理難做啊！逐儕就想：「這雨到底愛漚到幾時，好停哩！」
有一日，本本係落雨天，𠊎擎等遮仔、跔等頸根出門，看一眼滿地个落花，心情就像這天時恁毋好。無想著火車經過莊下時，一片青溜溜个田，餳著𠊎个眼光，蒔落去無幾久个秧仔，隻隻精神百倍，臥等頭享受雨水个滋潤，一陣風吹來，個個在水中歡喜跳等芭蕾。看著這光景，𠊎正分醒0，天下事總有兩面，有利就有弊、有得就有失、有圓就有缺，毋好總係用自家个立場來看萬事萬物。
「漚雨漚到人就會生菇囉！」儕儕堵著就恁樣喊。毋過，𠊎這下學會轉換𠊎个心情，利用漚雨清閒个時節，靜下心來，放慢腳步，用音樂、書本摎咖啡、清茶來配合雨水个節奏，也學會打開心胸，接受落花變做春泥護花个多情、還學會欣賞落雨天種種个詩情畫意。
110年全國語文競賽客家語朗讀文章高中學生組（四縣腔）
編號9號
【毛蟹】邱一帆原作
日頭下，圳溝肚脣項个石縫仔，伸出毛蟹个兩支大夾，大夾面項絨絨个毛，流水梳到一條一條，對清清个圳水面頂看過去，仰般條理清楚。阿明輕手輕腳，打水尾一步一步行兼該石頭縫，黏邊手一抓，恁注死0！手指嗄分毛蟹夾著，目珠窟一下碼灌入大水，痛到緊喊阿姆哀！
毋盼得放過毛蟹，阿明盡命牯愛同毛蟹拉出來，毛蟹乜拚命牯退入深深个空肚去，阿明个手毋知仰般嗄在空肚石縫卡著，無法度再過伸入去，乜無法度同毛蟹拉出來，出入就毋得！仰結煞？阿明用盡歸身个力，尿就險險洩出來，正同該支左手挷出來！該載正得，手伸得出來，毋過，手指嗄夾著一支毛蟹夾──毋著！係分毛蟹夾夾著，毋得㪐正著，這滿該死哩！
夾到緪緪个毛蟹夾，害阿明痛到會夭壽，佢目汁含等，遽遽用正手兩指，硬硬同夾仔捝0下來，手指面兩點分毛蟹夾著个痕跡，清清楚楚、鼓血鼓血！阿明心肝肚想：「捉毋著毛蟹，毛蟹夾乜毋好打爽！連蝦公共下摎佢帶轉去炒，同肉挖來食，再摎厥毛刮忒、串肥料線，拿來做夾仔搞，分人經驗一下分毛蟹夾著个痛……」。
阿明當記得，三十零年前還讀小學時節，分毛蟹夾著个這隻故事！三十年前，小南埔莊外个大河壩、外崗圳、中央圳、莊項个圳溝、脣頭个坑仔，阿明對水頭到水尾哪位就有行過，哪位就有搞過，佢輒常看著毛蟹、釣著毛蟹、食著毛蟹。阿明盡記得，有一擺落大雨、出汶水，佢在坑仔釣毛蟹，毛蟹一擺就兩隻、兩隻分佢釣起來，無一點鐘，就裝淰歸錫桶，佢歡歡喜喜擐轉屋下，分阿姆料理。又有一擺做大水个臨暗頭，阿明看著歸群歸群个毛蟹，蹶上石䃗，跈著山溝山壢行等上……。
三十年前，哪位就有、麼人就做得捉、麼人就食得著，該河壩、坑仔、圳溝肚个毛蟹，走到哪位去？三十年後，政府大量對中國進口，廢田坵、挖魚塘來畜个毛蟹，講啊著一隻就愛幾下百銀來買，麼人買得起、麼人食得起？阿明實在愐毋解。
110年全國語文競賽客家語朗讀文章高中學生組（四縣腔）
編號10號
【阿煥伯个想望】邱一帆原作
熱天，都市肚冷氣緊開緊大，有錢人享受冷氣，無錢个人忍受排出來个熱氣、廢氣，分人走無空囥，只因為愛歇在都市，分莊下人認為有出息，就算仰般無品質个生活也愛忍耐再忍耐！火爐堆，分人鍊金鍊銀，正經有較遽？
阿煥伯行到茄苳樹下，坐在大樹下个石頭面，緊想這兩三十年，在都市个生活，敢有麼个意思？便利个交通，無半點人情味；隔壁鄰舍徙來徙去，無半個還有聯絡；物質充足，有食毋忒个浪費、花毋忒个打爽；政治口水噴上噴下，兩三十年來，都市培養當多看高毋看低个目珠，短視近利，其實就像井肚个蛤蟆……。
講正經，還係莊下較贏！阿煥伯緊想緊有道理，莊下个隔壁鄰舍，該種單純、善良同熱情；莊下个自然、恬靜絕對比都市贏加十倍百倍，退休轉莊下，阿煥伯特別有感受。
「蛤蟆eb eb，屙屎相擲。」阿煥伯還記得有當多个蛤蟆，就在這山溝、山壢肚。暗晡頭，特別係落水過後个暗晡頭，蛤蟆eb eb滾个聲，響透山林、山田石䃗崁下，這下嗄毋知走到哪位去？聽隔壁熟絡山林河壩个阿亮仔講，這位還有蛤蟆哦！
毋過，歸個山頭，會分阿煥伯操透0、操交咧，還係尋毋著eb eb个蛤蟆，阿煥伯毋相信這係事實，阿亮仔講話應該毋會騙人，這下係轉去屋下一個半個都無捉著，見笑哦！阿煥伯行轉茄苳大樹下，等看啊！心肝肚想，係有，蛤蟆應該會出來啊，請遽遽出來哦！
涼風陣陣吹來，阿煥伯耳公聽著緊來緊多个聲音。風吹竹林疏疏滾个聲，穿過娘花叢項沙沙滾个聲，茄苳樹頂飛鼠尋食唧唧喊个聲，還有毋知名个蟲聲，這就係大自然个樂音！大自然个樂音就在阿煥伯个身邊、四圍，阿煥伯恁樣想。竹樹花草也在該自由搖擺，自然个聲響、自然个節奏、自然个律動，一切分人仰般自然个感受，無食酒也會有息把仔醉意啊！就算無捉著蛤蟆，今暗晡也值啦！
0戶檻：音fuˇ kiamˊ；門檻。
0縱：音jiungˊ；身體猛力向前或向上。
0咻啊出：音xiu a cudˋ；箭速般往外飛。
0聲說：音sangˊ sodˋ；聲音。
0一輪過一輪：音idˋ linˊ go idˋ linˊ；一趟又一趟。
0禾熱病：音voˇ ngied piang；稻熱病。發病時稻葉形成褐色，穀粒不充實或為空包彈，嚴重時葉片枯萎甚至整株枯死。
0潑潑跌：音bad bad diedˋ；此指汗粒直落。
0斷烏：音tonˊ vuˊ；天黑。
0水汴頭：音suiˋ banˊ teuˇ；原指控制水流的水閥，此處指地名。
0康熙：音kongˊ hiˊ；康熙。
0跌爐主：音diedˋ luˇ zuˋ；擲聖筊以決定下次奉侍神明的主事者。
0 幾下輪：音dinˊ giˋ haˊ linˊ；遶好幾圈。
0天墀坪：音tienˊ ciiˇ piangˇ；前庭院。
0倒覆：音do pugˋ；倒蓋著。
0橫：音vang；直立的物體倒下去。
0劇本：音kiagˋ bunˋ；劇本。
0濟濟踅踅：音ji ji jio jio；人多、來回走動貌。
0看往下：音kon gongˊ haˊ；向下看。
0颼颼滾：音xiu xiu gunˋ；風吹過的聲音。
0金若若仔：音gimˊ na na eˋ；閃亮如金。
0耐等；音ngai denˋ；忍受著。
0一輪：音dinˊ idˋ linˊ；遶一圈。
0眠一下仔：音minˇ idˋ ha eˋ；小憩片刻。
0傷重：音songˊ dong；很嚴重。
0過䢍：音go fang；超過。
0戶檻：音fuˇ kiamˊ；門檻。
0划：音paˇ；把食物撥進嘴裡。
0糴：音tag；買入穀物。
0胲哊哊仔：音goiˊ iogˋ iogˋ eˇ；渴望吃東西的樣子。
0吓：音haˇ；表疑問語氣。
0惡手毋當兩：音ogˋsuˋmˇ dong liongˋ；再厲害的人也比不上眾人的力量。
0啄咕：音dugˋ guˊ；打瞌睡時頻頻點頭貌。
0躡等腳尾：音ne denˋ giogˋ miˊ；抬起腳跟而靠腳尖著地著。
0齧牙齒：音ngad ngaˇ sen ciiˋ；咬牙切齒、凶惡的樣子。
0吱吱滾：音gi gi gunˋ；狀聲詞，痛的叫聲。
0三合水：音samˊ gabˋ suiˋ；三方水流交會的河水。
0四溝水：音xi gieuˊ suiˋ；屏東萬巒地名。
0的準：音dag zunˋ；非常準確、精準。
0淰黃：音nemˊ vongˇ；黃澄澄。
0毋打眼：音mˇ daˋ ngienˋ；不起眼。
0金狗毛：音gimˊ gieuˋ moˊ；臺灣金狗毛蕨。
0喌喌喌：音zu zu zu；叫雞的聲音。
0雉雞卵：音ciiˇ gieˊ lonˋ；腎蕨。
0躁光：音cau gongˊ；活潑好動。
0噦噦嘶嘶：音veˋ veˋ seˊ seˊ；大聲嘶喊。
0水篷：音suiˋ pungˇ；遮雨的棚子。
0弄上弄下：音nung songˊ nung haˊ；鑽上鑽下。
0開到鬧鬧：音koiˊ do nau nau；開得很繽紛的樣子。
0溚溚跌：音dab dab diedˋ；紛紛掉落。
0拐毋核：音guaiˋ mˇ hed；拐騙不住。
0貴參參仔：音gui semˊ semˊ eˋ；昂貴的樣子。
0分醒：音funˊ xiangˋ；清醒。
0恁注死：音anˋ zu xiˋ；恰巧、剛好。
0捝：音duiˋ；急扯。
0操透：音cau teu；翻遍。