閩南語朗讀競賽指導教案：如何引導學生掌握朗讀技巧與情感表達

如何指導學生參加閩南語朗讀競賽

蕭藤村臺文編寫

1. 朗讀的意義

朗讀是一門藝術，是一種有聲再創作，共無聲的文字轉做語言再創作的活動。聽眾就是欣賞藝術創作的人。

文字紀錄無法度表達語言的語氣、語意、語調、情感變化等等，朗讀者運用家己的聲音，表現出原來語言的語氣、語意、語調、情感變化等等，來引起聽眾的共鳴。透過朗讀，會當加強字音、字形、字義的聯合。

「朗讀」是用文學語言做底，運用語調的懸下、牽聲拔調、輕重緊慢的技巧，發揮朗讀特別的魅力，則會餳人。

2. 朗讀的三大目標

朗讀有三大目標──「對」、「準」、「媠」。

「對」：聲音愛對同，意境愛對同，感情愛對同。

「準」：語言愛準，判斷愛準，表達愛準。

「媠」：聲情會媠，文情會媠，欣賞會媠。

3. 深入體味文學作品

朗讀是透過聽覺，予聽眾用耳空來進行閱讀。朗讀者必須對作品先認真體會，準確表達文字作品的語詞涵義和精神實質。朗讀者一定愛共書面上無法表達的內在感情變化，先經過理解佮分析，則有法度運用語調的懸下、牽聲拔調、輕重緊慢來補充文字上的不足。朗讀者為著卜達到呰个目的，一定愛反覆閱讀、體會，深入體會文學作品。

4. 增進語感能力

語感，是人對語言文學的感受能力──伊體現了人對語言文字的一種敏感度，是一个人語言品質的反映。培養語感，愛經過聽、講、讀、寫的訓練，其中，朗讀訓練是培養語感上基本、上有效的方法。

5. 理解文意

理解，就是透過分析、判斷、綜合的活動，達到對作品的了解、體會，掌握伊的思想內容和精神實質。朗讀者須要徹底理解作品的內容，則會當正確佫真媠氣來表達。理解文意會使對作品的中心思想、筋脈層次、語詞語句、情意重點、基本情調等方面著手。

1. 把握中心思想

中心思想嘛號做主旨，是作品內容的主體。主旨是作品的靈魂，把握中心思想才有法度共作品的精神情意傳達出來。對作品呣但愛了解寫啥麼代誌、啥麼款人，佫愛明確具體掌握作者的心意。

正確表達出作品的訊息，進入情境，表達出呰種的主旨以後，則知影朗讀的媠䆀。

2. 清楚筋脈層次

筋脈層次是指作品的結構布局。清楚作品的結構層次，親像全篇攏總有偌濟自然段？段落佮段落有啥麼關係？重點佇佗位？佗位是過渡陪襯？頂下文按怎接應？按爾則會當有效、準確把握作者的思想感情所卜展開的筋脈。朗讀的時，根據作品的筋脈層次，則會當自然變換語調抑是歇睏，予聲音形式佫較明朗，予聽眾有較深的感受。

3. 明白語詞語句

作品是透過語詞語句表達出來的。朗讀者對作品的語詞、語句、語句、俗語的含義攏愛清楚明瞭，則𣍐誤解。除了這以外，著佫進一步體會作者所藏的的思想情感，則會當予語句懷捾豐沛的情感。

4. 強調情意重點

一篇作品攏有重點的段落，一句話攏有重點的詞語，所以作品的重點會佇關鍵性的詞句表現出來。體會著作品中情意的關鍵，朗讀的時就會使運用技巧，佇作品精彩的所在重重錘一下，佇輕籠籠的所在輕輕仔帶過。

5. 體會基本情調

基本情調是由作品總體情感所決定的語言特色。作品的感情色彩，來自作者的內心世界。朗讀愛把把握作品是屬於心平氣和的、慷慨激昂的、歡欣若狂的抑是哀傷戒懼的；抑是多留意語句間情感的變化。處處用心，儘量如實呈現作品感情的色彩和分量，才能忠於作者的創作主旨。

6. 表現技巧

朗讀常用的技巧，有「停頓」、「重音」、「語調」、「節奏」四項：

1. 停頓

停頓就是朗讀過程中聲音暫時的閬縫，伊會出現佇語句佮語句的中間，也會出現佇詞組佮詞組的中間，抑是層次佮段落的中間，表示中間有一定的結構體系。

適當的停頓，會使調節呼吸佮語氣，會予語意佫較清楚，嘛會使顯示結構層次，佫會使提高聽眾的注意力。停頓愛根據作品思想情感變化的要求來停頓。

停頓呣但是朗讀的時有需要喘氣，佫有表情達意的作用。停頓有「語法停頓」、「強調停頓」、「感情停頓」三項：

1. 語法停頓

語法停頓大部分是根據標點符號來停頓。如：頓號的停頓上短，逗號的停頓較長一點仔，分號佮破折號的停頓佫較長一點仔，句號、問號、感嘆號和省略號的停頓佫較長一點仔。語法停頓的時間大概如下：

2. 強調停頓

強調停頓是為著卜把握語句的意義，共一句語句切做幾偌的部分，抑是強調其中個別的語詞。強調停頓會當予語言強調的目的顯明出來。例如：

「活--咧_#就是真實。」

「馬上款款--咧_#就載兩个老--的轉去草地。」

頂面呰兩句話若無停頓，意義上並無啥麼妨礙，呣佫，若有停頓會予語意佫較清處，聽起來嘛較好聽。應用強調停頓的時，著若像卜斷佫呣成斷，也就是停頓的時間呣通傷長，則𣍐共句讀講斷去。

3. 感情停頓

感情停頓是為著卜顯明某種感情，佇朗讀的時就按照情緒的變化，作隨意的停頓。呰款的停頓有時是為著強調停頓下一語句的重要性，有時有時是為著引起聽眾的特別注意。例如：

「因為你_#上老；你_#上細，閣因為你_#是老人囡仔，你_#講著，逐家咧笑，是歡喜，你_#講毋著，逐家咧笑是好耍，」

感情停頓雖然會增強語言的感染力，引起聽眾注意停頓以後卜表達的語句，呣佫呰種停頓𣍐使傷濟，若無，可能會予人感覺變鬼變怪，顛倒無效。

2. 重音

重音是指朗讀的時，對語句中的一寡仔語詞抑是詞組、甚至某一个音節，佇聲音上特別強調的現象。

好好仔運用重音，會當表達語句所包含的感情，突顯作品的主題。重音一般有「語法重音」和「強調重音」兩類：

1. 語法重音

語法重音就是根據語句的語法結構特性，佇一寡仔語詞上講出來的重音。呰種重音往往是干但共音量小可仔放較重，並無代表啥麼特殊的思想感情。一般常見的語法重音位置有下列七種：

１.短句裡的謂語部分：

「我是一个浪漫的人。」

2.名詞前的定語：

「台南的地理上特殊。」

3. 動詞抑是形容詞頭前的狀語：

「日頭漸漸欲落山--矣。」﹑「厝--裡人客來真濟，足鬧熱的。」

4. 動詞後面的補語：

「阿母就笑kah軟腰。」﹑「大石頭附近的樹仔攏予人剉（tshò）kah 光光光。」

5. 疑問句中的代詞：

「I-仔，毋知好--無？」

6.「共」字介賓短語中的重點語詞：

「共（kā）冊包囥（khǹg）佇房間內的眠床頂，」

2. 強調重音

強調重音是為著強調某種特殊的思想感情，共語句的一寡仔詞語強調出來。強調重音若運用徦拄仔好，會予語意佫較顯明。呣佫強調重音出現佇語句中，並無固定的格式，是出在朗讀者根據所卜強調的語意來安排重音。所以仝款一句話，佇無仝的語境，抑是無仝的情意下，所卜強調的重音部分並無仝款。例如：

「啊！一枝紅杏出牆來。深宅高牆內，禮教食人，紅杏早就應該愛出牆--矣。」

3. 語氣

共聲音的懸下變化（語調）佮作者的情緒（語氣）密切配合，就會當予文章的語意佮感情充分顯現出來。朗讀的時愛配合作品的體會和內心感情的要求，來正確使用語調和語氣。佇朗讀的時，應該愛避免忽然吊懸，忽然放下、有時雄雄大聲，有時雄雄細聲，造成聽眾的聽覺負擔；嘛𣍐使攏無變化，用家己習慣的語調朗讀，逐篇文章講起來攏仝款。語氣是百百款，下面舉一寡仔例來講：

1. 肯定語氣

「伊應該是破病--啦。」

「我是玉英--仔--啦！﹑「安--啦！俺某--的，」

其中「破病」為肯定語詞。音調愛堅定有力，則會充分表達肯定的語氣。

2. 加強語氣

「伊怨天、怨地、怨命運、嘛怨阿公，」

「伊怨天、怨地、怨命運、嘛怨阿公，」是並列結構，「怨」的聲調愛一重比一重較懸，語氣則會營造加強的效果。

3. 重複語氣

「叫我第一名！叫我第一名！」

「叫我第一名！叫我第一名！」詞語重複，予人感覺虱目仔足衝的，所以愛講較輕快咧。

4. 否定語氣

「我心裡有數，毋敢出半聲。」

「毋敢」就是否定語氣。是對倒面來表現，所以愛較痞勢語氣。

5. 疑問語氣

「是汝搬抑是我搬？」﹑「班長哪會無來？」

「是汝搬抑是我搬？」聲調愛漸漸懸，則會充分表現疑問的自然語氣。

6. 樂暢語氣

「有夠好食--的啦！有夠好食--的啦！」

「有夠好食--的啦！」是真樂暢，聲調愛漸漸懸，則會表現出樂暢的語氣。

7. 悲傷語氣

「害--矣！哪會佮做眠夢仝款的運命。」﹑「是按怎死--的毋是我！」﹑「慘--矣！今仔日毋就閣敗市？」

呰幾句予人感覺悲傷。語氣應該放下，語調愛放下，速度嘛愛放慢，則會表達內心的感受。

8. 受氣語氣

「活欲氣--死。」

「活欲氣--死。」的「氣」字愛加強佫吊懸聲調，則會顯現受氣的情感。

9. 驚疑語氣

「啊！隔壁的舊厝當時拆掉--矣？」﹑「厝哪會攏拆掉--矣，為啥乜（mih）？」

「當時」﹑「為啥乜」愛加強佫較大聲，則會顯現驚疑的情感。

10. 歡喜語氣

「哇！今年遮（tsia）的水比往（íng）年較濟，」

「簡單號做雜菜園--啦！」

呰兩句話表現出歡喜的心情。所以「哇」﹑「啦」攏愛吊懸聲調，則會形容當時歡喜的款。

11. 重疊語氣

「雨水佇塗跤（kha）賴賴趖（luā-luā-sô），日頭共（kā）伊曝，風共伊歕（pûn），伊變做水氣走去天頂尾溜。」

「日頭共伊曝，風共伊歕，」的「曝」、「歕」，攏愛吊懸聲調，則會表現一重一重加強的語氣，來加強語句的效果。

12. 輕快語氣

「我轉--來矣！我轉--來矣！」

「我轉--來矣！我轉--來矣！」有緊急表達轉來的心情，所以必須講較輕快咧，則會表現緊快的語氣。

13. 權威語氣

「俗語講：「人𠢕，袂堪得天做對頭。」

「有人講：『蒙娜麗莎的文文仔笑，迷人閣kài高尚。』」

這是引用別人的話，來顯現伊的權威性，所以朗讀的時，語氣愛放慢、清楚。

14. 呼叫語氣

「共我放--轉去啦，老五--的！」﹑「『豆花！豆花！』伊的聲實在是中氣十足，」

「老五--的！」﹑「『豆花！豆花！』」這是呼叫的話，所以朗讀的時，語氣愛牽聲放慢。

4. 節奏

節奏包含聲調的懸下、輕重緊慢的特點，所以節奏包含聲調、重音、速度等等。朗讀的節奏，是藉著語言中緊慢的變化、輕重的對比、語調的懸低，來表現作品中變化多端的思想感情。朗讀的語言節奏應該愛佮作品內容的基本情調相互結合，則算是成功。聲調、重音佇頭前已經講過，下面來講朗讀。朗讀的速度分做快速、慢速和中速三種。

1. 快速

「就欲到位--矣！就欲到位--矣！」

快速適合用佇表達激動、緊張、驚惶抑是歡喜的感情，抑是敘述變化真緊的代誌，以及表達受氣、反抗、責罵、質問、辯解、緊張、激動、歡喜等等的內容。

2. 慢速

「白翎鷥，跤長長，kám會飛過阮故鄉的田園？」

慢速適合用佇表示沈重、悲傷、失望、艱苦、數念的情緒，抑是敘述平靜、莊嚴、躊躇的內容，拄著較僫予人理解的語句，也會使放慢速度，予聽眾有時間去理解。

3. 中速

「快車小姐，就是對號車頂的服務小姐；當時除了火車，公路局的長途對號車嘛有設按呢的服務小姐。」

中速一般是用佇感情無啥變化的語句，抑是一般的敘述、說明、議論的語句。速度佮停頓也有密切的關係：速度緊的時，停頓會使看情形減少；速度慢的時，停頓會使看情形增加。

7. 語音正確

「朗讀比賽」講求語音愛正確，若無，其他的佫較好，嘛攏歸佇空空。

1. 真緊講走精去的例

接受新詞的時定定會走精去，請看下面的例：

詞例	正音	俗音
避免	pi7-bian2	phiah4-bian2
寂寞	tsik8-bok8	siok8-bok8
糾紛	kiu2-hun1	kiu3-hun1
對象	tui3-siang7/siong7	tui3-siong3
歸東即逝	kui1-tong1tsik4-se7	kui1-tong1tsik4-se3
污染	u3-jiam2	u1-jiam2
植物	sit8-but8	tit8-but8
殖民	sit8-bin5	tit8-bin5
暑假	su2-ke3/ka3	su2-ka2
背景	pe3/pue3-king2	pue7-king2
賠償	pue5/pe5-siong2	pue5/pe5-siong5
暴力	po7/poo7-lik8	pok8-lik8
保障	po2/poo2-tsiong3/tsiang3	po2/poo2-tsiong1
評審	phing5-sim2	ping5-sim2
佩服	pe7/pue7-hok8	phue3-hok8
叛亂	puan7/phuan7-luan7	phuan3-luan7
冠軍	kuan3-kun1	kuan1-kun1
故障	koo3-tsiang3/tsiong3	koo3-tsiong1
糾紛	kiu2-hun	kiu3-hun1
藉口	tsia3-khau2	tsio3-khau2
召集	tiau3-tsip8	tsiau1-tsip8
傳統	tuan5/thuan5-thong2	tshuan5-thong2
產生	san2-sing1	tshan2-sing1

1. 聲調

「落山風對在地的環境有真大的影響，」、「紀傳洲」、「年紀」、「紀念」、「紀事」、「畢業典禮」。

2. 文白

「心情」、「六Ｏ年代」、「親情」、「熱帶地區」、「哪有彼號美國時間咧變遐（hia）的碗糕齣頭？」、「不時愛添柴灰仔，」、「看講分會出佗一粒是紅的，」、「近水知魚性，近山識鳥音。」、「阿媽雖罔半遂suī，」

3. 破音

三思而後行、會計、忌日、背影、「按呢就聽好食--矣。」

4. 合口音

/-m/ /-n/聲音、感心、啉水、函數。

2. 連讀變調要正確

以下是錯誤的例

「阿里山_#鄉塔山_#山峰群下跤的豐山村」

「心滿_#意足」

「無暝_#無日_#咧拚（piànn）」

「我繼續_#去坐佇電腦_#頭前_#寫論文」

「校長講_#明仔在_#免來學校」

3. 輕聲

   1. 語助詞

「交女朋友，簡單啦！」﹑「無--啦。」﹑「車就來--矣，」﹑「我轉--來矣！」﹑「小等--咧啦！」﹑「翁咧失德了然，」

2. 助動詞

「共你吵--著。」﹑「定定棉被掩(om/am)--咧」﹑「起來行行--咧，」

3. 時間詞

「紲--落去用火尾閣烘--一搭久仔」﹑「前(tsûn)--年」﹑「一直到九--月入秋的時陣，」

4. 名詞詞尾

「去園--裡種菜」﹑「阿義--仔翁仔某轉--來了後，」﹑「我是玉英--仔--啦！」﹑「每一年的十--月」

5. 介詞

「足毋甘--的，」「有夠好食--的啦！」

6. 補語

「較忝頭--淡薄仔」﹑「就一跡一跡關關--起來，」﹑「共牛牽--轉去。」﹑「予人招--入去，」﹑「共牛牽--出來，」﹑「攏會忍--落來，」﹑「後--來精神就失常失常，」

7. 量詞

「拜託買--一張！」﹑「鼻芳--一下」

8. 方位詞

「逐家徛佇邊--仔看，」﹑「佇頭--仔遐鬥一塊鐵仔，」﹑「啊彼隻蟳仔尾--仔有做海龍王--無，阮就毋知。」

9. 代名詞

「人咧創治--你，」﹑「一个囡仔問--我。」﹑「阿祖就信--伊，」﹑「彼是騙--人的，」﹑「老母安慰--伊老宋是好人的時。」

10. 疑問詞詞尾

「食飽--未？」﹑「你是咧著猴--是無？」﹑「看有漏屎否？」﹑「買牛愛去佗位掠--呢？」﹑「你講是毋是--neh？」

11. 序數詞尾

「一--來需要足濟跤手，」

12. 人名或稱謂詞詞尾

「阿母吳--氏」

4. 外來語

外來語照外來語講，呣免佫車跋反。

「ok-sàng」﹑「Oo-too-bái」﹑「lailinguh」﹑「phòng-phuh仔」﹑「引擎(ia̋n-jín)」﹑「雪文(sap-bûn)」﹑「thài-luh」﹑「看板(kha̋ng-páng)」﹑「La-jí-ooh』﹑「歐吉桑』﹑「Vespa」﹑「BVD」﹑「卡拉OK」﹑「羅曼蒂克」﹑「百雀翎」﹑「威尼斯」﹑「看到國旗，肅立致敬」。

8. 無仝文體的朗讀法

朗讀的基本要求是講予準確、講予輦轉、講予有感情。無仝體裁的作品有無仝的特點，朗讀的時愛看文體，採取無仝的講法。

朗讀比賽的文體以記敘文、抒情文、說明文為主。

1. 記敘文朗讀指導

例文：〈彼陣吼海的子民──記Kapasoa夜祭〉、〈頂山仔跤記〉、〈懷念阿母〉、〈顧口的佮辯士〉、〈教育的種子〉、〈阿母讀冊記〉、〈弓蕉王國旗山〉

記敘文是一種記人、敘事、寫景、狀物的文體，有時、空、人、事、景、物、因、果等線索，記敘文經常會佇清晰、真切的敘述中啟發人心，真少用說教的語氣，有時會加減抒發思想情感。所以朗讀記敘文的時，必須順著記敘的發展線索，佇作品中的人、事、物、景中求具體變化，予作品的立意展現出來，予人佇不知不覺中感觸著作品的立意。

記敘文的語言，是真幼膩的。作者用幼膩的敘述和描寫，順著作品發展線索，則會顯示作者的深沈立意。朗讀者嘛著幼膩來表達。

2. 抒情文朗讀法

例文：〈懺悔〉﹑〈山的感想〉﹑〈茉莉花〉﹑〈金針花出牆來〉﹑〈毋甘〉

抒情文較偏重感情的抒發，就是共內心的感受，運用感性的文詞寫出來的文章。感情是百百種，愛去體會各種的感情，朗讀抒情文的時，愛順趁情意，自然綴感情行就好，呣通傷假仙，若無，會破壞感情的氣氛。

3. 說明文朗讀法

例文：〈大坌（hun）坑文化佮（kap）原住民〉﹑〈對文化變遷看臺灣地名之二：殖民篇〉

說明文是以說明為主的表達方式，注重說明事物的形狀、性質、成因、關係、功用等問題，重點佇訊息、意見、觀念的表達佮解釋，有傳播知識的功用。

說明文主要是運用說明的方式，對事物抑是事理，客觀說明，用客觀的立場共卜說明的內容傳達清楚。所以朗讀說明文的時，節奏愛平穩，語速是中範的，文氣是平穩的。語調呣通忽然懸忽然下。

9. 加註朗讀符號，幫助練習

朗讀符號並無統一的規定，上重要的是家己用起來真順。朗讀符號建議如下：

10. 朗讀文章分析舉例

用〈毋甘〉做例，分析如下：

〈毋甘〉是抒情文，節奏是慢速，略仔有沈重、苦痛、數念的情緒。基本情調是依戀過去。

第一段連紲用三个「假使」、「譬喻」抒發人生觀，佫連紲用三个「譬喻」來講家己，卜予人歡喜，卜予人欣賞，家己煞真孤軍。每一个「假使」就是一小段，一層比一層的感情較深，愛沓沓仔入去較深的所在。規段偏重抒情，語速愛放慢。

第二段的主體是用「規家伙仔攏誠無閒」佮「過甲誠快活」對比，分做三小段，第一小段「介紹家庭背景」，第二小段「介紹阿爸、阿母、阿姊為家庭扑拚，」第三小段「抒發阮規家伙仔無閒、快活」，引入〈毋甘〉的主題。第一小段、第二小段說明性較濟，語速會使較緊，第三小段進入抒情，語速愛放慢。

第三段的主體是「老爸毋甘共囡仔分予別人做囝」，分做兩小段。第一小段是「人卜來分囡仔做囝」，第二小段是「毋甘共囡仔分予人」。規段的對話佔真濟，對話的部分愛照對話的氣口。

第四段的主體是「數念細漢的時，佮阿爸做伙看布袋戲、聽古，誠心適。」分做三小段，第一小段介紹阿爸的娛樂，第二小段是「佮阿爸做伙看布袋戲。」第三小段是「佮阿爸做伙聽古。」本段偏重記事，愛把握記敘文的特色。

第五段的主體是「數念大漢的時，佮人戀愛。」分做三小段，第一小段「回想菁仔欉𧺣入來。」第二小段「介紹菁仔欉。」，第三小段「回想佮菁仔欉做伙𨑨迌，誠快樂。」本段偏重記事，愛把握記敘文的特色。

第六段，應該益有較濟的「毋甘」，可惜去予人刣掉去。

08毋甘

韓滿

假使(ká-sú)講人生像舞台，_#我希望家己是一个笑詼劇的丑仔，毋但會當共快樂帶予別人，嘛會當共歡喜囥佇心內；_##假使講人生是一本冊，_#我希望家己是一本內容精彩的故事冊，逐家看了會想欲閣看；_##假使講人生是真珠、瑪瑙、璇石貫(kǹg)起來的袚鍊，遐爾仔光、遐爾仔顯(hiánn)，_#為啥物我的人生敢若幾粒仔暗淡的星，佇遐爍--咧、爍--咧，閣有淡薄仔孤單？_###

阮兜的囡仔真濟，阿爸干焦是一个小小的公務人員，逐個月的月俸無夠通予遐爾仔濟口人食。_##阿爸下班了後，就去巷仔口排擔仔――削甘蔗、破(phuà)西瓜，加減仔趁錢；阿母嘛佇厝跤邊飼雞、飼鴨佮飼豬；阿姊透早就去市場，抾菜葉仔轉來予雞仔、鴨仔食。_##雖然阮規家伙仔攏誠無閒，毋過，阮攏嘛過甲誠快活。_###

阮兜出--去彼條路，就是嘉義上蓋有名的林森路，有一个衫仔行的頭家來阮兜行幾若擺，伊共阮爸母講：「恁兜囡仔傷濟，阿梅也誠有我的緣，若予我做囝，我會好好仔共伊栽培，後日仔定著會有出脫，恁兩个序大人嘛毋免做甲遐爾仔忝(thiám)！」_##阮老爸共伊應講：「囡仔欲來綴我食穿，我若有一喙水通啉，囡仔上無都有一碗番薯簽湯通啉；雖然無大魚大肉通食，毋過，絕對袂去予枵--著、寒--著。毋管我的囡仔有偌濟，我攏袂共囡仔分予別人做囝--啦！」_###

阮細漢的時，阿爸為著阮這陣囡仔，逐工做工課做甲活欲忝--死，毋過，伊上大的娛樂就是聽『la-jí-ooh』、看布袋戲。_##彼陣我誠愛讀冊，所以阿爸上疼--我。伊攏會𤆬(tshuā)阮去看布袋戲，史艷文、藏鏡人……遮的人，予阮囡仔時陣的日子過甲誠心適。_##逐暗規家伙仔攏去睏--矣，阿爸就提『la-jí-ooh』去柴間仔聽。這陣，我會過去共阿爸司奶(sai-nai)閣佮阿爸做伙聽『la-jí-ooh』，劉備三請孔明、孫臏(Sun Pīn)鬥龐涓(Pâng Kuan)……攏是阿爸上愛聽的戲齣。_###

阮大漢的時，踏入社會食頭路--囉(looh)！有一工落雨，一个幔雨幔的菁仔欉，青磅白磅走入來辦公室，阮誠受氣共伊講：「毋管你有啥物代誌，先出去共雨幔褪--落來才閣講。」_##後--來，這个人定定來阮公司，伊生做懸懸--仔閣小可仔大箍，毋但誠愛講笑，有當時仔嘛會挈(khe̍h)物仔來予阮食。_##有一擺歇睏日，伊𤆬(tshūa)阮去山頂𨑨迌，閣紮阮上愛食的葡萄，伊毋但共葡萄洗甲誠清氣，閣共葡萄拭甲誠焦才予阮食，實在足感心--的。到山頂的時，伊沿路行沿路呼噓仔(khoo-si-á)，阮沿路行沿路抾楓(png)仔葉，規路有講有笑，予阮規工攏誠快樂。

阮阿爸、阿母知影阮佮伊來往了後，四界去探聽，講阮自細漢就手不動三寶，手無縛雞之力，查甫兮兜作穡，後擺若嫁過去就愛作穡，會食苦，捀人的飯碗捀𣍐起。自按爾，阿爸去學校共阮辦休學（迄陣阮佇夜間部讀冊），阿母去公司共阮辦辭職，阮規工攏佇厝裡嘛攏𣍐使出門，簡若去予人軟禁仝款。

有一工，較早的同學來我，阮出去一下看，則知影是迄个查甫人用苦心，騎機車去五十里外載阮同學，來阮兜𤆬我出去的。阮父母知影呰件代誌了，氣徦疲疲掣，對細漢攏呣捌共阮扑過的阿爸，出手大力共阮搧喙，阮規个人攏暈去也，阮呣但喙誠疼，連心嘛誠怨慼，為啥麼我踏入感情線的第一步就即爾仔苦？

阿爸、阿母攏睏徦誠落眠，阮凊彩挈幾領衫仔，對後壁窗仔出去，跳落來拄好是鐵枝路，好佳哉！無去予人看著。雖然講無人看著誠安心，呣佫，呣知安怎？呰陣，阮鼻頭一下痠，目箍紅起來，目屎煞簡若雨水，一直落落來。

阮佮迄个查甫人去公證結婚，暝日攏會使佮伊做夥囉。呣佫無親情朋友的祝福，予阮感覺誠孤單、誠稀微。伊知影阮的心事，定定𤆬阮去四界逸陶，做一个誠體貼的好翁婿。

人講：「生米煮成飯。」厝裡的人攏原諒我囉，呣甘我佇外口流浪，叫阿姊來𤆬我轉去逸陶。看著兩个老大人，為著我的代誌，煩惱徦規个頭殼頂攏是白頭毛、規个喙攏是皺紋，予阮誠呣甘，怪當初家己傷衝碰，則會傷父母的心。

囡仔出世囉，呣佫誠痞育飼，月裡半暝仔攏呣睏，阮就愛共伊抱蹛手裡搖，滿月了，阮規身軀攏齊痠疼，阮問阿母，則知影阮細漢嘛是按爾，人講：「手抱孩兒，則知父母時。」呰陣，阮心頭、鼻頭齊痠起來，阿母，阮對不起汝，細漢共汝凌遲，大漢佫惹汝受氣，阮真不孝。

有一冬的冬天阿母過往了，阿爸家己一个人誠無伴，一工一工一直消㾪落肉，阮誠呣甘，定定𤆬後生轉去看阿爸，後來，阿爸嘛定定來阮兜載外孫去看火車，佫講伊較早佇鐵路部做工課的代誌，看著阿爸面上的笑容，阮則淡薄仔安心。

阿爸幾偌工無來載孫仔囉，阮挈阿爸上愛食的柿餅轉去看伊，則知阿爸感冒誠重，看伊講話誠無氣力，看起來嘛佫較㾪矣！阮斡頭偷偷仔拭目屎，煞去予阿爸看著，伊講：「我猶誠勇健咧，煩惱啦！」阿爸就是即爾仔呣甘阮輾(lian³)目屎，佫即爾仔疼阮的人。

阿爸的病誠實好起來矣，伊講伊三十幾冬無去阿里山囉，後每若有機會，足想卜去一每，看今也的阿里山佮較早有啥麼無仝。阮兄弟姊妹參詳了，扑算卜𤆬阿爸去阿里山逸陶，逐家歡歡喜喜攢徦誠齊備。卜出發的進前一工，氣溫佫落降，阮驚阿里山傷寒冷，阿爸會擋未椆，就按爾呣敢𤆬阿爸去阿里山，阿爸喙裡無講啥麼，呣佫，幾偌工攏呣講話，阮想：迄當時阿爸定著誠失望的。

無偌久，阮接著電話講阿爸跋倒囉，今也佇厝邊的兜，阮趕緊趕去，對厝邊仔遐共阿爸扶轉去，扶阿爸坐椅仔，看伊坐𣍐好勢，身軀一直溜落去；阮緊倒一杯冷滾水予阿爸，看伊未好勢，滾水一直滴落來。我的翁婿即時趕𢓜位，佫叫救護車來，阮做夥共阿爸扶上車，路裡，阿爸一直卜共氧氣拔落來，阮想阿爸定著是呣愛拖累人，呣佫，阮呣甘予伊受苦，阮定著卜救阿爸。

呣管阮安怎用心照顧，猶原無法度救阿爸，阿爸佇病院蹛半個月，猶是放阮做伊去囉，呣管阮安怎哭，安怎傷心，上屆疼阮的阿爸永遠𣍐轉來囉！

想著阿爸，看著身邊的人，呰陣，則發現阮的翁婿一直㾪落去，阮再三叫伊去檢查身體，伊攏講：「我身體誠勇咧，無代誌啦！」抑無就講：「生癌哦！好空的代誌𣍐輪著我啦！」等𢓜有一工，阮押伊去做檢查，一切攏傷慢囉！伊誠實是生癌矣。

阮𤆬伊對南𢓜北、對國裡𢓜國外，對中醫看𢓜西醫佫看𢓜密醫，四界走𧺣，有目屎哭𢓜無目屎，終歸尾嘛無法度挽椆伊的性命。兩个佮阮上親，上疼惜阮的人，攏離開阮囉。

下暗時仔，四界靜靜靜，阮愛翻較早的相片，想著過去，有苦，有酸嘛有甜，阮佫較希望佇夢中佮來相見，阮嘛卜共講：「恁今也好否？阮會好好仔過日子，阮會好好仔疼惜阮家己。」

11. 朗讀注意的事項

1.呣通讀傷緊，讀傷緊較會脫棰。

2.呣通朗讀錯誤，錯誤一定扣分，尤其是破音字。

3.尊重原作，呣通隨意加減文字。

4.注意聲音的表情配合文章的感情。

5.表達作者寫作的意境，傳達作者的情緒。

6.語句卜結束的時，愛漸漸慢落來。

7.換氣的時愛先𠲿氣。

8.段落卜結束的時準備揭頭看評審，大約三拍左右的時間。

12. 參賽者的條件

選擇學生參加比賽﹐上少愛有下面七个條件﹕

1. 語音正確

發音的習慣呣是一兩個月訓練會出來的﹐若無正確的發音﹐想卜訓練徦好﹐就若像『豆豉仔發芽－－無可能。』

2. 音量愛有夠大

一个人講話的聲音強弱大細是定著的﹐講話若傷細聲﹐氣勢就弱﹐會較無範。

3. 音調起落

音調有起有落﹐講話則會氣﹐講話若傷平﹐就𣍐吸引人﹐聲調愛有個性﹐自然假就好聽。

4. 音色豐厚

音色是指聲音的品質與特點。音色會清﹑會響﹐一定較贏面。

5. 反應敏捷

反應緊﹐較有法度把握場面﹐抑若無﹐就會『驚驚𣍐著等。』

6. 臺風大範

臺風愛穩﹑氣勢十足﹑表情豐富。音調﹑音量愛配合朗讀內容變化﹐『小生苦旦免相瞞﹐骹花先踏出來看。』若有夠大才﹐就較會當專心朗讀。

7. 歡喜甘願

若是大人興比賽﹐囡仔都無愛﹐佫較扑拚牽教﹐嘛『押雞公呣成𥦸。』